नेपालभाषा नाइट क्वचाल
येँ (सन्ध्या टाइम्स)/नेपालमण्डल फाउण्डेशनया ग्वसालय् ऐतिहासिक यल लाय्कुलिइ जूगु नेपालभाषा नाइट तःजिक क्वचाल। फाउण्डेशनपाखें नेपालभाषां संचालन याना वयाच्वंगु बुखँ व ब्लगस नेपालमण्डल डटकम निदँ फुनाः स्वदँ क्यंगु लसताय् थुगु ज्याझ्वः ग्वसाः ग्वःगु खः ।
न्हू पुस्तायापिं नापं पेशागत रुपं थीथी ख्यलय् सक्रिय जुयाच्वंपिं नेवाःतय्त नेपालभाषा, साहित्य, कला संस्कृतिया संरक्षण व संवर्द्धनय् नुगः क्वसायेकेगु ल्याखं थुगु ज्याझ्वःया ग्वसाः ग्वयागु ज्याझ्वः कजि नापं फाउण्डेशनया अस्मित मल्लं जानकारी बियादीगु दु ।
ज्याझ्वलय् नेपाःया थीथी जनजातितय् लोप जुया वनाच्वंगु सांस्कृतिक व लोकबाजंया संरक्षया नापं नेवाःतय्सं पर्व विशेषय् जक थायेगु याना वयाच्वंगु बाजंयात संवर्द्धन व संरक्षणया नापं उकियात न्हूपुस्ताया दथुइ क्यनेत नखःचखः व पर्वया इलय् जक मखु ई व परिस्थितियात ल्वयेक नं थाये जिउ धकाः क्यनेगु निंतिं न्ह्यचिलाच्वंगु ल्याय्म्हतय् सांगीतक पुचः कुतुम्बपाखें थीथी आदिवासी/जनजातिया लोक सांगीतक प्रस्तुतियात न्ह्यब्वःगु खः ।
ज्याझ्वलय् मूपाहां कथं मिस नेपाल २०१० मय्जु सदीक्षा श्रेष्ठ, प्राइम कमर्सियल बैंकया उप महाप्रबन्ध भाजु भाइराजा तुलाधर, नांजाःम्ह काटुर्निष्ट भाजु रविन साय्मि, वरिष्ठ फोटोग्राफर भाजु राजभाई सुवाल व समाजसेवी नापं व्यापारिक ख्यलय् नांजाःम्ह मय्जु सरजुबाबा श्रेष्ठ झायादीगु खःसा मय्जु सदीक्षा श्रेष्ठं थःगु नुगः खँ प्वंकादीगु खः ।
जापानया मय्जु सुन्दरी मिकां थीथी नेवाः म्येँ न्ह्यब्वयादीगु ज्याझ्वः मिस नेवाः ११२९ आकाशा वज्राचार्य, मिस नेवाः ११३० सुजिना शाक्य, मिस नेवाः ११३० लिउ लसता श्रेष्ठ व मिस नेवाः ११३० लियांलिउ निशा शाक्यंपिंसं न्ह्याकादीगु खः ।
