गुथिया जग्गा व्यक्तियात नकेगु सुझाव

येँ (सन्ध्या टाइम्स)/सरकारं गठन याःगु वैज्ञानिक भूमिसुधार उच्चस्तरीय आयोगं गुठी संस्थान खारेज यायेगु सिफारिस याःगु दु। तर गुठी संस्थान खारेज यानाः संस्थान मातहत लानाच्वंगु जग्गा फुक्कं सम्बन्धित गुथियात मखु कि जग्गाय् मोही जुयाच्वंपिनिगु नामय् तयेमाः धकाः नं आयोगं सिफारिस याःगु दु। संविधानसभाया प्राकृतिक स्रेत बाँडफाँड समितिपाखें वैज्ञानिक भूमिसुधार बारे राय कायेत उगु आयोग गठन याःगु खः। आयोगं गुठी संस्थान खारेज यानाः उकिया जग्गा फुक्कं मोहीया नामय् छ्वयेमाः धकाः याःगु सिफारिसयात धाःसा नेवाः ख्यलं विरोध याःगु दु। गुठी संस्थान खारेज यानाः नेवाःतय् जात्रापर्व संचालन यायेगु बारे सुझाव बीत यँयाः पुन्हिया इलय् गठन याःगु आयोगया दुजः डा. चुन्दा वज्राचार्यं गुठी संस्था खारेज यायेगु पाय्छि खः तर उकिया जग्गा मोहीयात बीगु धाःसा सही मखु धयादीगु दु। 'सन्ध्या टाइम्स'लिसे खँल्हासें वय्कलं गुठी संस्थान खारेज यानाः उकिया जग्गा फुक्क सम्बन्धित गुथियात हे बीमाः धयादिल। यदि मोहीयात जग्गा बियाछ्वत धाःसा गुथि चले यायेत आयस्ता मदइगु खँ कँसें वय्कलं संस्थान खारेज जुइधुंकाः सकलें गुथित दुथ्याःगु छगू ट्रष्ट दयेकाः उकिं हे गुथिगाना चले याइगु सुझाव नं बियादिल। गुथिया आपालं जग्गा संस्थानया कर्मचारी व भूमाफियात जानाः मेपिंसं नया तयेधुंकूगु कारणं मोहीया नामय् तयेगु धायेसातकि स्वतः जग्गा पचे जुइगु खँ धाःगु दु ।