उपसमितिया न्हापांगु मुँज्याय् हे पौडेल अनुपस्थित
येँ (सन्ध्या टाइम्स)/न्हूगु संविधान निर्माणया झ्वलय् विवाद जुयाच्वंगु विषयत ज्यंकेगु निंतिं धकाः संविधानसभाया संवैधानिक समिति अन्तर्गत गठन याःगु उपसमितिया न्हापांगु बैठकय् हे नेपाली कांग्रेसया संसदीय दलया नेता रामचन्द्र पौडेल अनुपस्थित जुयादीगु दु ।
कांग्रेसपाखें प्रतिनिधित्व यानादीम्ह पौडेल अनुपस्थित जूगुलिं उगु उपसमितिया संयोजक क्वःछी मफुत। अथे जूसां उगु उपसमितिया संयोजकय् एकीकृत माओवादीया अध्यक्ष प्रचण्ड हे कजि जुइगु सम्भावना दु धकाः छम्ह दुजलं जानकारी बियादीगु दु ।
उगु उपसमितिया दुजलय् एकीकृत माओवादीया अध्यक्ष प्रचण्ड, नेपाली कांग्रेसया पौडेल, एमालेया बरिष्ठ नेता माधवकुमार नेपाल, चिचीधंगु दलपाखें नेकपा (संयुक्त)या कल्पना राणा व मधेसवादी दलपाखें सद्भावना पार्टीया सहअध्यक्ष लक्ष्मणलाल कर्ण च्वनादीगु दु। वंगु शुक्रवाः जक संविधान निर्माणया सवालय् विवाद जुयाच्वंगु ८३ गू बुँदाया विषयय् सहमति ब्वलंकेगु निंतिं धकाः फागुन मसान्त तकया ई बियाः उगु उपसमिति दयेकूगु खः ।
संविधानसभाया सचिवालय सिंहदरवारय् थौं सुथय् च्वंगु उगु उप समितिया बैठकं विवादित विषय समाधान यायेगु निंतिं विज्ञतय्गु तकं राय कायेगु कथं कार्यविधि तयार याःगु दु ।
उप समितिया उगु बैठकं माल धाःसा विज्ञतय्गु तकं सुझाव कायेगु निर्णय याःगु दु ।
