नागरिक सर्वोच्चता कायम यायेत राजीनामा : प्रचण्ड
प्रधानमन्त्री एवं एकीकृत नेकपा (माओवादी)या अध्यक्ष पुष्पकमल दाहाल प्रचण्डं थःगु राजीनामा प्रधानसेनापतियात अवकाश बियागुलि मखसें नागरिक सर्वोच्चता कायम यायेत जूगु खँ धयादीगु दु ।
माओवादी अध्यक्ष प्रचण्डं राष्ट्रपति डा. रामवरण यादवं असंवैधानिक पलाः ल्ह्वनाः नागरिक सर्वोच्चताया विरुद्ध ज्या याःगुलिं जक राजीनामा बियागु खँ धयादीगु दु । वयेकलं थ:पिं नागरिक सर्वोच्चता कायम यायेत स्वयांच्वंगु ईलय् राष्ट्रपतिं सन्य सर्वोच्चता कायम यायेत स्वःगु द्वपं बियादिल ।
शनिवाः येँय् राज्यपाखें बेपत्तायापिं शहीद छेँजःतय् न्हापांगु राष्ट्रिय सम्मेलनया उल्लेज्या यासें वयेकलं नागरिक सर्वोच्चताया निंतिं नीद्वं मनूतय्सं बलिदान बीत नं थःपिं तयार जूगु तर सैनिक सर्वोच्चता छुं नं हालतं स्विकार्य मजुइगु खँ धयादिल ।
वयेकलं आः थ्व देय् विदेशीतय् इसारा कथं चलेमजुइगु धासें देय्यात ल्हाति कायेत स्वईपिं विदेशी प्रभुया दलाली यापिनि विरुद्ध थःम्हं ब्यूगु राजीनामा तःधंगु ल्वाभ जुइ धयादिल । वयेकलं थःम्ह आवेगय् वया राजीनामा मबीयाःगु बरु जनतायात विश्वास यानाः राजीनामा बियाःगु धयादिल । वयकलं थ्व राजीनामा जनातायात छप्पँ याइगु ल्वाभ जुइ धयादिल ।
अथेहे वयेकलं नेपाली कांग्रेसं करोडौं तका: ध्यबा खर्च याना: मेगू दलया सभासद् न्यायेत स्व:गु द्वपं बियादीगु दु । वयेकलं विदेशीतय् इशाराय् सभासदत न्याये मीगू ज्या जुइत्यंगु धासें उकी पाखे सतर्क जुइत दक्वसित इनाप यानादिल ।
