थौं एमाले स्थायी समितिया बैठक
येँ (सन्ध्या टाइम्स)/नेकपा (एमाले) स्थायी समितिया बैठक थौं च्वनेत्यंगु दु। मन्त्रिपरिषद् विस्तारबारे सहलह यायेत च्वनेत्यंगु मुँज्या आः सुथसिया ११ ताः इलय् एमाले संसदीय दलया ज्याकू सिंहदरवारय् च्वनी। मुँज्या मन्धि परिषद् विस्तारया निंतिं थीथी दलत नापं जूगु सहलहया नं समिक्षा याइ ।
मन्त्रिपरिषद् विस्तार व थीथी दलत नापं जूगु वार्ताया प्रगति हे थौं च्वनीगु मुँज्याया निंतिं मुख्य एजेण्डा दयेकातःगु सीदुगु दु। वर्तमान सरकार गठनया निंतिं प्रमुख भूमिका म्हितूगु एनेकपा (माओवादी)यात गथे यानाः सरकारय् दुथ्याके फइ धइगु खँय् नं थौं सहलह मुँज्या केन्द्रीत जुइगु एमालेया छम्ह नेतां धाःगु दु ।
लुमंकेबहजू, वर्तमान सरकार गठनया निंतिं माओवादी व एमाले अध्यक्ष दथुइ जूगु न्हय्गू बुँदाया सहमति कथं माओवादी गृह मन्त्रालय थःपिंत बीमाःगु दावी याना वयाच्वंगु दुसा एमालेया नेतापिं माधव नेपाल व केपी ओलीं सुरक्षाया दृष्टिकोणं महत्वपूर्ण मन्त्रालय माओ जनयुद्ध न्ह्याका वःगु माओवादीयात बीमजिउ धइगु खँय् अडान तया वयाच्वंगु दु ।
