एमाले नेतृत्व सरकारया विकल्प मदु : ओली

एमालेया प्रभावशाली नेता केपी शर्मा ओलीं न्हूगु सरकारया नेतृत्व थःगु दल बाहेक सुनां नं यायेमफइगु खँ धाःगु दु ।

ख्वपय् जूगु छगू ज्याझ्लय् न्ववासें वयेकलं एकीकृत माओवादी सरकार संचालन याये असफल जुइधुंकूगु धासें वयेकलं देय्यात निकास बीत एमाले नेतृत्व सरकारया विकल्प मदु धयादिल ।

वयेकलं माओवादीं एमाले नेतृत्वया सरकारया खँय् सहमति मक्यंसाः संसदय् बहुमत कयासां न्हूगु सरकारया नेतृत्व याइगु खँ धयादिल । अथेहे वयेकलं माओवादीं संसद अवरोध यासाः उकीया विरुद्ध कडा पलाः ल्ह्वनीगु धयादिल ।

नेता ओली माओवादीया हे कारणं देशय् अराजकता अप्वयाच्वंगु व सरकारं कानुनी राज्य स्थापना यायेत असफल जूगु द्वपं बियादिल ।