सर्वोच्चया फैसलां रिट निवेदक चकित
येँ (सन्ध्या टाइम्स)/संविधान च्वयाः जारी मयाःतले संविधानसभा भंग जुइ मखु धकाः सर्वोच्च अदालतपाखें याःगु फैसला खनाः सर्वोच्चय् उगु रिट तयादीम्ह अधिवक्ता विजयराज शाक्य अजूचायादीगु दु। वय्कः लिसें अधिवक्ता कमलेश द्विवेदीं सभासद्त थःपिंसं हे संविधानसभाया म्याद थपे यायेगु धकाः निर्णय यायेगु गलत खः, उकिं उमिसं थगुने जेठ १४ गते संविधानसभाया म्याद मेगु दछि थपे यायेगु धकाः याःगु निर्णय बदर जुइमाः धकाः उगु रिट तयादीगु खः ।
तर सर्वोच्च अदालतं संविधान च्वयाः पित महःतले संविधानसभा कायम हे जुयाच्वनी धकाः फैसला यानाः निर्वाचन सम्बन्धी सम्पूर्ण अवधारणायात हे वेवास्ता याःगु खँ अधिवक्ता शाक्यं कनादिल। थौं 'सन्ध्या टाइम्स' लिसे खँ ल्हासें वय्कलं धयादिल, 'थ्व नजिरं यानाः कन्हय् संसदय् नं सांसदत सकलें मिले जुयाः चुनाव हे मयासे वहालवाला संसदयात हे मेगु न्यादँ म्याद थपे यायेगु धकाः निर्णय याना वने फइगु अवस्था जूगु दु ।'
सर्वोच्चपाखें तसकं गलत नजिर स्थापना यायेत स्वःगु द्वपं बिसें वय्कलं थुकिया विरुद्ध थःपिं पुनरावेदनय् नं वने फुगु खँ कनादिल।फैसला वंगु कार्तिकय् हे जूगु खःसां उकिया पूर्णपाठ आः नकतिनि वःगु जुयाः थःपिंसं उकिया अध्ययन निं यानाच्वनागु खँ नं वय्कलं कनादिल। फैसलायात मेपिंसं नं विरोध याना हःगु दु ।
