थौं नेवाः व ताम्सालिङया सीमा संवाद

येँ (सन्ध्या टाइम्स)/संघीय लोकतान्त्रिक गणतन्त्र नेपाः दुने नेवाः स्वायत्त राज्य व ताम्सालिङ स्वायत्त राज्यया सीमायात कयाः जुयाच्वंगु विवाद समाधान यायेत थौं व कन्हय् निगुलिं प्रस्तावित प्रदेशया न्ह्यलुवात व सभासद्तय् दथुइ संवाद जुइत्यंगु दु ।

नेपालय् सभागितामुलक संविधान निर्माण सहयोग परियोजना, संयुक्त राष्ट्रसंघीय विकास कार्यक्रमया ग्वसालय् गोकर्णय् निन्हुयंकं जुइगु उगु अन्तरप्रदेश संवादय् संविधानसभाय् दुपिं नेवाः व तामाङ सभासद्तय्सं ब्वति काइ। नेवाः स्वायत्त राज्य मंकाः संघर्ष समिति व ताम्सालिङ संघर्ष समितिया प्रतिनिधितय्सं नं ब्वति काइगु उगु संवाद ज्याझ्वलय् प्रा. कृष्ण हाछेथुं नेवाः व ताम्सालिङ प्रदेशया सीमा विवादयात कयाः सहलहया नितिं प्रस्ताव न्ह्यब्वयादीगु ग्वसाः दु। थौं नेवाः स्वायत्त प्रदेशया सीमायात कयाः नेवाः स्वायत्त राज्य मंकाः संघर्ष समितिया सचिवालया कजि मल्ल के. सुन्दरं प्रस्ताव न्ह्यब्वयादी ।

थौं थ्वहे निगू प्रस्तावयात कयाः सहलह जुइ। अथे हे कन्हय् ताम्सालिङ स्वायत्त प्रदेशयात कयाः परशुराम तामाङं प्रस्ताव न्ह्यब्वयादी। संविधानसभाया राज्य पुनर्संरचना नापं राज्य शक्ति बाँडफाँड समितिं नेवाः, ताम्सालिङ नापं थीथी प्रदेशया प्रस्ताव हयेधुंकूगु अवस्थाय् नेवाः व ताम्सालिङया सीमायात कयाः विवाद ब्वलंगुलिं उगु विवाद मदयेकेगु लागिं थ्व अन्तरसंवाद ज्याझ्वः यायेत्यंगु खः। थौं व कन्हय् निन्हुयंकं जुइगु अन्तर प्रदेश संवादपाखें थ्व निगू प्रदेशया सीमा विवाद ज्यंकेत सकारात्मक भूमिका म्हितीगु आशा यानातःगु दु ।