एमालेया प्रस्ताव माओवादीयात अस्वीकार
येँ (सन्ध्या टाइम्स)/आःयात गृहमन्त्रालय प्रधानमन्त्रीं हे तयेगु धकाः नेकपा (एमालें) याःगु प्रस्तावयात एनेकपा (माओवादीं) अस्वीकार याःगु दु। थौं सिंहदरवारय् निगू दलया दथुइ जूगु सहलहया झ्वलय् एमाले अध्यक्ष लिसें प्रधानमन्त्री खनालं तत्कालया निंतिं गृह थम्हं तयेगु प्रस्ताव याःगु खः ।
प्रम खनालया थुगु प्रस्तावय् माओवादीं लडाकू समायोजन व पुनःस्थापनाया प्रक्रिया पुरा मजूतले सुरक्षा सम्बन्धी मन्त्रालय माओवादीयात बीबलय् मेमेगु पक्षं माने मयाइगु जूगुलिं प्रमं हे गृह नं तयेगु प्रस्ताव याःगु खः। प्रमया थुगु प्रस्तावया लिसलय् माओवादीं न्हय्गू बुँदाया सहमति कार्यान्वयन जुइमाः धासें प्रस्ताव अस्वीकार याःगु खः ।
न्हय्गू बुँदाया सहमतिइ गृह, रक्षा लगायत महत्वपूर्ण मन्त्रालयया सम्माजनक व उचित रुपं बाँडफाँड जुइमाःगु खँ दुथ्यानाच्वंगु धासें माओवादी सहमति कथं हे मन्त्रालय दयेमाःगु नं अडान न्ह्यःने तःगु दु ।
थौं च्वंगु बैठक लिपा देशी व विदेशी शक्तिया दबावय् लानाः माओवादीयात सुरक्षा सम्बन्धी मन्त्रालय मबीगु धकाः गुगु प्रस्ताव वःगु खः व थःपिंत गुगुं नं हालतय् स्वीकार्य मदुगु माओवादी नेता देव गुरुङ्गं धयादीगु दु। वय्कलं थौंया बैठक सकारात्मक मजूगु धासें थौं हे च्वनीगु स्थायी समितिया बैठकं थ्व विषयय् आवश्यक निर्णय यायेगु नं धयादीगु दु ।
माओवादी स्थायी समितिया बैठक आः न्हिनसिया ३ ताः इलय् मू ज्याकू कोटेश्वर स्थित पेसिरडाँडाय् च्वनेत्यंगु दु ।
