गृह व रक्षा मबीगु एमालेया बटम लाईन : ओली

नेकपा (एमाले)या नेता केपी शर्मा ओलीं माओवादीया जनसेना व ल्वाभः व्यवस्थापन क्वःमछुतले सुरक्षा सम्बन्धि मन्त्रालय छु नं हालतय् माओवादीयात मबीगु धयादीगु दु ।

वय्कलं गृह व रक्षा मन्त्रालय माओवादीयात बीमज्यूगु एमालेया बटम लाईन दुगु दावी नापं यानादीगु खः । पर्साया वीरगञ्जय् थौं ग्वसाः ग्वःगु पत्रकार सम्मेलनय् ओलीं माओवादीं न्हय्गू बुँदे सहमतिया नामय् एमालेयात जाली तमसुक याकेब्यूगु द्वपं नापं बियादीगु खः ।

प्रधानमन्त्री निर्बाचनय् माओवादीं एमालेयात समर्थन यानाः उदारता क्यंसां नं उगु समर्थन षड्यन्त्रपूर्ण व ग्यानापूगु जूगु वय्कलं धयादीगु दु । नेता ओलीं दलतदथुइ विश्वास व सहकार्य माःगु धयादिसें आःया हे अवस्था कायम जुयाः च्वंसां ल्यं दुगु स्वलाया इलय् नं शान्ति व संविधानं पूर्णता कायेमफइगु दाबी यानादीगु खः ।