एमालेया निर्णय बारे प्रचण्डयात जानकारी

येँ (सन्ध्या टाइम्स)/प्रधानमन्त्री नापं एमाले अध्यक्ष झलनाथ खनालं एकीकृत माओवादीलिसे जूगु न्हय्गू बुँदाया सहमतियात थःगु पार्टीया केन्द्रीय कमिटीं गथे खः अथे हे पारित याःगु खँ कनादीगु दु ।

थौं सुथय् माओवादी अध्यक्ष प्रचण्डलिसे भेटवार्ता लिपा संचारकर्मीतलिसे खँल्हासें प्रधानमन्त्री खनालं थ्व खँ धयादीगु खः।सिंहदरवारय् प्रचण्डयात नापलानाः पिहां वयाखतं संचारकर्मीतय्त वय्कलं धयादिल, 'न्हय्गू बुँदाया सहमित केन्द्रीय कमिटीया बैठकं गथे खः अथे हे अनुमोदन यानागु जानकारी वय्कःयात बियागु दु, आः वय्कःपिं प्रस्ट जुल जुइमाः ।'

तर माओवादी अध्यक्ष प्रचण्डं धाःसा वार्ता लिपा नं थःपिं स्पष्ट जुयागु खँ कनामदी। प्रमया धारणा न्यनेधुंकाः थौं च्वनीगु स्थायी समितिया बैठकं पार्टीया आधिकारिक धारणा पित बीगु खँ वय्कलं कनादिल। वय्कलं धयादिल, 'आः हे जिं थथे हे धाये फइगु अवस्था मदु। स्थायी समितिया बैठक लिपा पार्टीया आधिकारिक धापू वइ ।'

थौं सुथय् संवैधानिक समितिया बैठक जुयाच्वंगु हे इलय् माओवादी व एमालेया निम्ह शीर्ष नेतात बैठक त्वःताः अलग्ग वार्ता याः वंगु खः। वय्कःपिं एमालेया संसदीय दलया ज्याकुथी वार्ता याःगु खः। उगु इलय् माओवादी नेता मोहन बैद्य व एमाले नेता सुरेन्द्र पाण्डे नापं मेमेपिं नं दुगु खः ।