नेवाः प्रहरीया माग यासें ज्ञापनपत्र
येँ (सन्ध्या टाइम्स)/देशय् गृह मन्त्रालय सुनां कायेगु धकाः विवाद जुयाच्वंगु इलय् लाक्क एकीकृत नेवाः राष्ट्रिय मुक्ति मोर्चा येँ जिल्लां नेवाः लागाय् नेवाः प्रहरी हे तयेत माग याःगु दु। थ्व माग यासें मोर्चां थौं येँया सिडियोयात छगू ज्ञापनपत्र नं लःल्हात। नेवाः स्वायत्त राज्यया अवधारणा कथं नेवाःतय्गु लागाय् नेवाः
प्रहरीया हे ब्यवस्था यायेमाःगु माग मोर्चां याःगु खः ।
मोर्चाया येँ जिल्ला नायः पञ्चलाल महर्जनया नेतृत्वय् जिल्ला प्रशासन कार्यालयय् थौं वंगु पुचलं उगु ज्ञापनपत्र लःल्हाःगु खः। प्यंगू बुँदाया उगु ज्ञापनपत्रय् प्रहरी प्रशासनय् प्रहरी सरुवा व नियुक्ति यायेगु इलय् नेवाः बाहुल्यता दुगु बस्तीइ नेवाः अधिकृततय्त हे प्राथमिकता बीमाःगु नापं अथे याये मफइगु अवस्थाय् तत्कालया नितिं कमसेकम नेवाः भाय् सःम्ह अधिकृतयात छ्वया हयेमाःगु, जिल्ला प्रशासन ज्याकुथिं नेवाः जातियात प्रभावित जुइगु व सम्बन्धित जुइगु छुं नं ज्याखँय् निर्णय यायेबलय् वा सहलह ब्याकेबलय् सरोकारवाला व नेतृत्वदायी नेवाः संगठनलिसे नं सल्लाह व सुझाब कयाः जक निर्णय यायेमाःगु, येँय् दुपिं नेवाः समुदायलिसे सम्बन्धित ज्या यायेमालीगु सरकारी ज्याकुथी फयांफत्तले नेवाः हे वा नेवाः मदुसा कमसेकम नेवाः भाय् सःपिं अधिकृतयात तयेमाःगु, थनया आदिवासी नेवाःत येँ जिल्लां पिने सरुवा जुयाः वनाच्वंगु दुसा इमित येँय् हयाः ज्या याकेगु वातावरण दयेकत नं उकी माग यानातःगु दु ।
नेवाःतय्गु थुगु माग पूरा मजुल धाःसा संघर्षय् वनेगु बाहेक मेगु बिकल्प दइ मखु धकाः नं ज्ञापनपत्रय् धयातःगु दु ।
