चैत दुने स्ववियुया निर्वाचन याकेमा:गु क्रान्तिकारीया अडान
अखिल क्रान्तिकारीया नायः हिमाल शर्मां स्ववियु निर्वाचन चैतया स्वंगूगु वाः जुइमाःगु जानकारी बियादीगु दु । अखिल क्रान्तिकारी आर आर क्याम्पस इकाइया थौं ग्वसाः ग्वःगु भेलाया उलेज्या ज्याझ्वलय् न्वंवानादिसें नायः शर्मां अथे धयादीगु खः । वय्कलं चैत स्वंगूगु वालं उखे निर्वाचन चीके मज्यूगु अडानय् क्रान्तिकारी दुगु धयादिसें निर्बाचन प्रणाली समानुपातिक जुइमाःगुलिइ बहः बियादीगु दु ।
प्रत्यक्ष निर्बाचन प्रणालीइ अल्पमतं बहुमतयात शासन याइगु जूगुलिं समानुपातिक प्रणालीइ अखिल क्रान्तिकारी अडिग जूगु वय्कःया धापू खः ।
विद्यार्थी नेता शर्मां क्याम्पसय् जुइगु भ्रष्टाचार व गुण्डागर्दी दिकेत नियमावली हे हिलेमाःगुलिइ बहः नापं बियादिल । वय्कलं शिक्षाय् ब्यापारीकरण अन्त्य यायेत व सरकारी विद्यालयया स्तर वृद्धिया नितिं क्रान्तिकारी विद्यार्थी न्ह्यःज्यानाच्वंगु धयादिल ।
थ्वहे दथुइ थौं क्वचाःगु भेलां अखिल क्रान्तिकारी आर आर क्याम्पस इकाइलय् न्हूगु पदाधिकारी ल्यःगु दु । भेलां राजकुमार दाहालया नायःसुइ सच्छि व स्वम्ह दुजः दुगु इकाइ समिति ल्यःगु खः । इकाइया न्वकुसं कैलाश दलामि व तारा बनेम जुयादीगु दुसा छ्याञ्जेय् इन्द्र लामा जुयादीगु दु ।
