संवैधानिक समितिया बैठक अर्थ न बर्थया

संविधान निर्माणया अन्तरवस्तु मिलय् यायेत थौं नीस्वने धयातःगु उपसमिति कन्हय् जक नीस्वनीगु जूगु दु । संवैधानिक समितिया थौं च्वंगु बैठकय् फुक्क दलं थःगु खँ तयेत ई मगाःगुलिं कन्हय् जक उपसमिति नीस्वनेत्यंगु खः । संविधान निर्माणया मू भालाः दुगु संवैधानिक समितिं थःत ग्वाहालि यायेत उपसमिति नीस्वनेगु कुतः याःगु दु । थौंया बैठकय् न्वंवानादीपिं आपालं दलया नेतातय्सं उपसमिति नीस्वना हे न्ह्यःने न्ह्यायेमाःगु जानकारी ब्यूगु संवैधानिक समितिया सभापति निलाम्बर आचार्यं जानकारी बियादीगु खः ।

उपसमितिइ फुक्क दलया प्रतिनिधित्व जुइगु विषयलय् थौं हे सहमति जूसां नं समितिइ च्वनीपिं दुजःतय्गु ल्याः, कार्यक्षेत्र लगायत क्वःछीगु ज्या धाःसा कन्हय् जुइगु धाःगु दु । बैठकय् प्रधानमन्त्री झलनाथ खनाल, माओवादी नायः पुष्पकमल दाहाल प्रचण्ड, कांग्रेस संसदीय दलया नेता रामचन्द्र पौडेल लगायतया फुक्क धइथे दलया प्रमुख नेतातय्गु ब्वति दुगु खः । थ्व स्वयाः न्ह्यः नीस्वंगु नीन्हय्गू दल दुथ्याःगु उच्चस्तरीय कार्यदलं निसः स्वयाः अप्वः विवादीत बुँदाय् सहमति कायम यायेगु कुतः याःगु खः । विवाद समाधान यायेत नीस्वंगु उगु कार्यदल संवैधानिक समितिया सभापति निलाम्बर आचार्यया विरोधलिपा विघटन याःगु खः । कार्यदलया थाय् कायेत्यंगु उपसमितिं मिलय् यायेल्यं दनीगु च्यय्स्वंगू बुँदाय् सहमति कायम यायेगु नेतातय्सं दाबी याःगु दु ।