संविधान तयार यानाः लागू यायेगु ई मंत

येँ (सन्ध्या टाइम्स)/संविधान दयेकेगु लागिं तयार यानातःगु कार्यविधि फुक्कं पालना यानाः यदि वैधानिक रुपं न्ह्याः वनेगु खःसा जेठ १४ गते न्हूगु संविधान पिहां मवइगु निश्चित दु। वैधानिक रुपं वनाः संविधान च्वयेगु ई हे मगायेधुंकूगु खँ विज्ञतय्सं धयाहःगु दु ।

संविधानविद् डा. पूर्णमान शाक्यं मेगु हे लँपुपाखें संविधान दयेकूसा खः, यदि वैधानिक लँपु पार यानाः वनेगु खःसा संविधान च्वयेगु लागिं ई हे मगायेधुंकूगु खँ कनादीगु दु ।

संविधान च्वयेत थनिं ९० न्हु ल्यं दनि। तर आः तक नं संविधानया आपालं महत्वपूर्ण बुँदाय् कायम जुयाच्वंगु विवाद समाधान मजूनि। ल्यं दुगु ९० न्हुया दुने थ्व विवाद तकं समाधान जुइगु खः लाकि मखु धाये फुगु अवस्था मदु ।

संविधान च्वयेगु ई मदुगु कारणं आः संक्षिप्त संविधान जकसां जारी यायेगु तयारी नं जुयाच्वंगु दु। तर डा. शाक्यं धाःसा अज्याःगु संक्षिप्त संविधान जारी यायेगुया छुं हे अर्थ मदुगु खँ कनादीगु दु। अपाय्धंगु संविधानसभा दयेकाः नं माःमाःगु खँ हे त्वःफिकाः संविधान जारी यायेगु खःसा न्हूगु संविधान छु यायेत माल धइगु न्ह्यसः वय्कलं तयादीगु दु ।

खास यानाः संविधान दयेकेगु जिम्मा कया वःपिं राजनीतिक पार्टीत थःपिनि एजेण्डापाखें चिलाः मेमेथाय् वंगु कारणं हे थज्याःगु समस्या पिहां वःगु खँ धायेगु याः। संविधान च्वयेगु लागिं धकाः थःपिंसं हे निर्धारण याःगु निदँया ई फुनाः मेगु दछि थपे याःगु खः। थपे जूगु दछिया नं गुला वने हे धुंकूगु दुसा आः स्वला जक ल्यं दनि। छुं जुयाः थ्व ई तक संविधानया पूर्ण मस्यौदा तयार हे जुइधुंकूगु खःसां नं उकियात पारित यानाः लागू यायेगु लागिं गुगु प्रक्रिया जुयाः न्ह्याः वनेमाःगु खः, उगु प्रक्रिया पूरा यायेत हे स्वलाया ई मगाःगु खँ संविधानसभा सूत्रं धाःगु दु।