एमालेया अजब नेतातय् गजब ताल
येँ (सन्ध्या टाइम्स)/एमाले अध्यक्ष झलनाथ खनाल व माओवादी अध्यक्ष प्रचण्ड दथुइ जूगु ७ बुँदे सहमतियात कयाः एमाले दुने जुयाच्वंगु विवाद साम्य यायेगु लागिं मध्यमार्गी जुयाः पिहां वःगु नेतातय्सं न्ह्यःने तःगु तर्क न्यनाः थौंकन्हय् एमालेया मेपिं नेतात न्हिलाच्वंगु दु ।
विज्ञ सूत्रं बिउगु जानकारी कथं मध्यमार्गी नेता प्रदिप नेपालं उकुन्हु पुलांम्ह प्रधानमन्त्री माधव नेपालयात नापलानाः थथे धयादीगु जुयाच्वन, 'न्ह्यागु सम्झौता जूगु जूसां म्वाःल, थज्याःगु सम्झौता धइगु ला थ्व देशय् गुलि जुल गुलि का। तर छुं लागू जुल ला? महाकाली सन्धि ला लागू मजू धाःसा थज्याःगु सम्झौता लागू जुइ ला? उकिं सम्झौता जूसा जुइके बिउ, लागू यायेगु इलय् लटरपटर यानाः सिधयेका छ्वःसा जि हे जिल। आःयात सरकार चले याके बी माल ।'
प्रदिप नेपालया उगु सुझावं माधव नेपाल नं प्रभावित जुयादीगु खँ सूत्रं धाःगु दु। वय्कलं सम्झौताया विरोध यानाच्वनेगु स्वयां उकियात वास्ता हे मयासे त्वःता छ्वःसा पार्टी व पार्टी अध्यक्षया प्रतिष्ठा बचे जुइ धइगु सुझाव बियादीगु खँ एमाले सूत्रं धाःगु दु ।
उखे विवाद पिकयाच्वंम्ह नेता खड्ग ओलीं धाःसा सम्झौताय् उल्लेख जुयाच्वंगु 'जनताको' धइगु खँग्वलय् आपत्ति क्यनादीगु दु। वय्कलं 'समावेशी गणतन्त्र' जक धाःसां गाःथाय् 'जनताको समावेशी गणतन्त्र' धाःगुलिं थ्व ला माओवादी खँग्वः जुल धकाः विरोध यानादीगु खः। 'जनताको' खँग्वः माओवादी जुल धाःगुलिं वय्कःयात छम्ह नेतां 'जनताको बहुदलीय जनवाद' छु खँग्वः ले धकाः न्ह्यसः तःगु खः ।
