पोलिटब्यूरो बैठक निर्णय थःगु अनुकुल
येँ (सन्ध्या टाइम्स)/एनेकपा (माओवादी)नापं जूगु न्हय्गू बुँदाया सहमतिया विषययात कयाः निगू गुटय् विभाजन जूगु नेकपा एमालेया नेतातय्सं पोलिटब्यूरो बैठकया निर्णययात थःपिनिगु अनुकुल जुइकथं ब्याख्या याःगु स्रोतं न्ह्यथंगु दु। एमाले संस्थापन पक्षं न्हय्गू बुँदाया सहमतिया मर्म व भावना कथं हे पोलिटब्यूरो बैठकं पारित याःसा नेपाल-ओलीया असन्तुष्ट पक्षं धाःसा परिमार्जन यानागु खँ धाःगु दु ।
निगुलिं दलया अध्यक्ष दथुइ जूगु सहमतियात कयाः पिहां वःगु विवादय् हाकनं ब्याख्या याये धुंकूगु अवस्थाय् आः हाकनं उकियात कयाः थप संशोधन यानाच्वनेमाःगु आवश्यक मजूगु एमालेया छम्ह नेतां धाःगु दु ।
सहमतियात गुगुं छगू जक पक्षं संशोधन याये मफइगु धासें थुकिया निंतिं निगुलिं पक्षयात सहमति आवश्यक जूगु नं उम्ह नेतां धाःगु दु। सहमतिया भावना व मर्म मस्यनी कथं माल धाःसा थप ब्याख्या याये फइगु नं वय्कलं धयादीगु दु। तर संशोधन हे धाःसा मजुइगु नं वय्कलं स्पष्ट यानादिल ।
संस्थापन पक्षया उम्ह नेताया धापू अःखः ओली पक्षया छम्ह नेतां धाःगु पोलिटब्यूरो बैठकं न्हय्गू बुँदाया सहमतियात परिमार्जन मयाःगु धकाः एमालेया नेतातय्सं धाःगु खँयात माओवादीया पक्षपोषण याःगु द्वपं बियादीगु दु ।
