छापामार हाकनं प्रमाणीकरण या : कोइराला

नेपाली कांग्रेसया कार्यवाहक सभापति सुशिल कोइरालां अनमिनया गम्भीर त्रुटिया या:गुलिं माओवादी छापामार प्रमाणिकरण हाकनं यायेत माग याःगु दु ।

रिपोटस्र क्लबय् शुक्रवाः जूगु छगू ज्याझ्वलय् वयेकलं माओवादी अध्यक्ष प्रचण्डया भिडियो टेपं अनमिनया त्रुटि क्यंगु धयादिल । कार्यवाहक सभापति कोइरालां भिडियो टेप प्रकरणं अनमिनया विश्वासनियताय् नं न्ह्यसः चिं थंगूलिं थकू तत्काल थःगु धारणा सार्वजनिक यायेत इनाप यानादिल ।

कोइरालां एमालेयात सरकारया नेतृत्व कायेत इनाप याःगु धासें थ्व सरकारयात कांग्रेस सरकारय् वंसां पिने च्वंसाः ग्वहालि याइ धयादिल । सरकार देयेकेत लिबाःसाः षडयन्त्र जुइफुगु धासें एमालें याकनं निर्णय यासाः थःगु पार्टीं बहुमतय् थ्यंकाबीगु दाबी यानादिल ।