एमालेपाखें ७ गू बुदाय् संशोधनया प्रस्ताव
एमालेया प्रस्तावयात माओवादीं अस्वीकार याइगु
येँ (सन्ध्या टाइम्स)/नेकपा (एमाले) पोलिटब्यूरो बैठकं असन्तुष्ट पक्षया माग कथं एनेकपा (माओवादी) नापं जूगु न्हय्गू बुँदाया सहमतिया महत्वपूर्ण बुँदाय् संशोधन यायेगु निर्णय याःगु दु। पार्टी मू ज्याकू बल्खुइ च्वंगु एमाले पोटलिब्यूरो बैठकय् वरिष्ठ नेता माधव नेपाल व केपी ओली पक्षं आपत्ति प्वंकुसे बुँदाय् सहमति यायेत याःगु माग कथं संशोधनया निंतिं प्रस्ताव याःगु मागयात सर्वसम्मतिं पारित याःगु खः ।
उखे पोलिटब्यूरो बैठकं सहमति संशोधन प्रस्ताव पारित याःगु खँय् एमाले अध्यक्ष लिसें प्रधानमन्त्री झलनाथ खनालं सम्झौता खारेज यायेबलय् थः संकटय् लाइगु व गथे खः अथे हे अनुमोदन यायेबलय् नं पार्टी दुने अराजकता अप्वइगु जुयाः तच्वकं बहस जुइवं लिपा मध्यमार्गी लँपु नालेगु सहमति जूगु स्रोतं जानकारी बिउगु दु। बैठकं न्हय्गू बुँदाया सहमति संशोधन यायेगु नापं माओवादीयात तत्काल गृह मन्त्रालय मबीगु निर्णय जूगु एमालेया छम्ह नेतां जानकारी बिउगु दु ।
थ्व हे झ्वलय् एमाले पोलिटब्यूरों बैठकं न्हय्गू बुँदाया सहमति संशोधन प्रस्ताव पारित याःसां उकियात माओवादीं माने मयाइगु जूगु दु। थःपिंलिसें सहमतिया आपालं महत्वपूर्ण बुँदा एमालें यकःति ढंगं संशोधनया प्रस्ताव हःगु धासें उकियात स्वीकार मयायेगु माओवादी धापू दु ।
सहमतिया भाषा परिमार्जन याये फइगु खःसां उकिया मूल मर्म व भाजना अःखः जुइकथं संशोधन याये मफइगु माओवादी नेता देव गुरुङ्गं धयादीगु दु। एमाले पोलिटब्यूरो बैठक स्वयां न्ह्यः जूगु सहलहया झ्वलय् नं सहमतियात संशोधन याये मफइगु बिचाः माओवादी पक्षं तःगु खः ।
