न्हय्गू बुँदे सहमति खारेज यायेत कोइरालाया माग

नेपाली कांग्रेसया सभापति सुशील कोइरालां एनेकपा (माओवादी) व नेकपा (एमाले) दथुइ जूगु न्हय्गू बुँदे सहमति खारेज जुइमाःगु खँ धयादीगु दु ।

नेपाली कांग्रेसया जागरण अभियान अन्तर्गत मंगलवाः कपिलवस्तुया सदरमुकाम तौलिहवा थ्यंकादीम्ह कोइरालां न्हय्गू बुँदे सहमति अन्तरिम संविधानया मर्म व भावना अःख जूगु धासें उकियात परिमार्जन मखसें खारेज हे यायेमाःगु धयादिल ।

वय्कलं न्हय्गू बुँदे सहमतिं शान्ति प्रक्रियायात पूमवंकीगु व न्हूगु संविधान निर्माणय् नं ग्वाहालि मयाइगु दावी तकं यानादिल । फुक्कं खँ पारदर्शी जुइगु थौंया इलय् बन्द कोठाय् निगू दल दथुइ जूगु सहमति थःत मान्य मजूगु धासें तत्काल खारेज जुइमाःगु धयादिल ।