राष्ट्रिय सरकार देयेकेमाः : एमाले
एमालें माओवादी व कांग्रेस सहितया राष्ट्रिय सरकार देयेकेमाःगुलि बः ब्यूगु दु ।
शुक्रवाः पार्टी केन्द्रीय ज्याकू बल्खुइ च्वंगु बैठकय् अधिकांस केन्द्रीय दुजःतय्सं शान्ति प्रकृया निष्कर्षय् थ्यंकेत व न्हूगु संविधान निमार्ण यायेत प्रमुख दलत दथुइ सहकार्य आवश्यक जूगु खँय् बः ब्यूगु दु ।
अध्यक्ष झलनाथ खनालं राजनीतिक अवस्थाया समिक्षा यासें भावी रणनीतिया बारे थःगु बीचाः प्वंकादीगु खः । वयेकलं राजनीतिक दलत दथुइया तिक्तता अप्वःगुया कारण मालाः राष्ट्रिय सहमतिया सरकारया विकल्प मदुगु धयादिल । वयेकलं देय् गम्भीर मोडय् थ्यंगुलिं छुं नं शक्तियात निषेध यानाः निकासया सम्भावना मदुगु खँ धयादिल । शुक्रवाः न्ववापिं अधिकांस दुजःतय्सं माओवादी व कांग्रेसयात दुथ्याकाः न्हूगु सरकार गठन यायेमाः खँय् बः ब्यूगु खः ।
बैठकय् पोलिटब्यूरोया निर्वाचन, स्थायी समितियात विस्तार यायेगु, केन्द्रीय दुजःतय् कार्य विभाजन लगायतया कार्यसूची अनुमोदन याःगु दु । बैठक शनिवाः हाकनं च्वनी ।
