सहमति खारेज मजुइकं कांग्रेसं वार्ता मयाइगु
सहमति खारेज वा प्रधानमन्त्रीया राजीनमा : पौडेल
एकीकृत नेकपा (माओवादी) व नेकपा (एमाले) दथुइ जूगु न्हय्गू बुँदे सहमतिप्रति आक्रामक जुयाच्वंगु नेपाली कांग्रेसं उगु सहमति खारेज मजुइकं निगू दलतनाप वार्ता मयाइगु जूगु दु ।
कांग्रेस सभापति सुशील कोइरालां थौं सुथय् बाँके कोहलपुरय् कार्यकर्ता नापलाना खँल्हाबंला यायेगु झ्वलय् न्हय्गू बुँदे सहमतिं शान्ति प्रक्रियायात निष्कर्षय् थ्यंकीगु स्वयां झन् अःख लिच्वः लाकीगु दावी यानादिल । वय्कलं उगु सहमतियात राजनीतिक धोकाया संज्ञा नं बियादिल ।
वय्कलं शान्ति व संविधानयात अःख लिच्वः लाकीगु सहमतिया छुं अर्थ मदुगु धासें उगु सहमति खारेज मजुइकं बहुपक्षीय वार्ताय् मच्वनीगु धयादिल ।
उखे कांग्रेस संसदीय दलया नेता रामचन्द्र पौडेलं सहमतिय सरकार निर्माण यायेगु निंतिं प्रधानमन्त्री झलनाथ खनालं राजीनामा बीमाःगु धयादीगु दु ।
थौं सुथय् कांग्रेस संसदीय दलया ज्याकूथी संचारकर्मीत नाप खँल्हाबंला यानादिसें पौडेलं निगू दल दथुइ जूगु सहमति खारेज जुइमाःगु मखुसाः प्रधानमन्त्री राजीनामा ब्यूसाः जक सहमति सम्भव दुगु धयादीगु खः ।
