ईश्वर व प्रदिपया क्याम्प हिलाबुला
येँ (सन्ध्या टाइम्स)/एमालेया महासचिव ईश्वर पोखरेल व नेता प्रदिप नेपालया दथुइ तकराबं यानाः एमालेया केन्द्रीय कमिटीइ संस्थापन पक्षं बहुमत हइगु सम्भावना अप्वया वःगु दु। वय्कःपिं निम्हेसितं एमालेया 'गुड मेनेजर'या रुपय् कायेगु याः ।
ईश्वर पोखरेलं उप प्रधानमन्त्री नापं गृहमन्त्री नये मखनेवं थः न्हापा संस्थापन पक्ष कथं पार्टीया महाधिवेशनय् चुनावय् ल्वानाः महासचिव पदय् त्याःगु जूसां नं आः वयाः क्याम्प हिलाः माधव-ओली पक्षय् वंगु खः। एमालेया महासचिव पोखरेलनाप न्हापांनिसें ईश्वर माधव क्याम्पय् वनेवं वय्कःलिसे मिले मजूम्ह नेता प्रदिप नेपालं नं थःगु क्याम्प हिलादीगु दु। वय्कः नेपाल नाप नापं मेमेपिं नेतात मुकुन्द न्यौपाने, पशुपति चौलागाई, बिरबहादुर तामाङ व वंशीधर मिश्रपिंसं नं क्याम्प हिलादीगु दु। नेतात न्यौपाने, चौलागाई, तामाङ व मिश्रपिं नं न्हापांनिसें महासचिव पोखरेल नाप मिले मजूपिं खः ।
प्रदिप नेपालया नेतृत्वय् न्याम्हेस्यां हे माधव-ओलीया क्याम्प त्वःताः संस्थापन पक्षय् वंगु दु। विशेष यानाः कन्हय् जुइगु पार्टीया केन्द्रीय कमिटीइ माःगु कथं भूमिका म्हितेत इमिसं क्याम्प हिलादीगु खः धकाः एमालेया छम्ह नेतां धयादीगु दु ।
न्याम्ह नेतातय्सं माधव-ओली पक्ष त्वःताः संस्थापन पक्षय् वंगुलिं केन्द्रीय कमिटीया बैठकय् खनाल पक्षया बहुमत दइगु सम्भावना अप्वया वःगु दु धकाः नं एमाले सूत्रं धाःगु दु ।
