माओवादी सभासद् खड्का मंत
येँ (सन्ध्या टाइम्स)/एकीकृत माओवादीया केन्द्रीय दुजः नापं सभासद् गौरीशंकर खड्का थौं सुथय् मंत ।
ताः ई न्ह्यवंनिसें क्यान्सरं ल्वचं कयाः पीडित जुयाच्वंम्ह ४५ दँया खड्का थौं सुथय् पौने ७ बजे यलया ग्वार्कोय् च्वंगु बी एन्ड बी अस्पतालय् वासः याकुयाकुं मदुगु खः। माओवादीया कोचिला राज्य समितिया सचिव खड्का छुं दिं न्ह्यः जक भारतया न्हूदिल्लीइ वासः याकाः लिहां झाःम्ह खः। वय्कः झापा क्षेत्र नं. २ पाखें प्रत्यक्ष रुपं त्यानावःम्ह सभासद् खः ।
थौं हे येँय् अन्तिम श्रद्धाञ्जली लिपा दाहसंस्कारया नितिं वय्कःया शव झापा यंकीगु खँ दु। मदुम्ह सभासद् खड्कायात माओवादीया बरिष्ठ नेतात, सभासद्त नापं कार्यकर्तातय्सं श्रद्धाञ्जली प्वंकूगु दु ।
पार्टीइ राजेन्द्र उपनां तयातःम्ह खड्काया जहान व छम्ह काय् नापं मां नं दनि ।
