याकनं पूण सरकार वइ: प्रम खनाल
येँ (सन्ध्या टाइम्स)/प्रधानमन्त्री झलनाथ खनालं वर्तमान सरकारं याकनं पूर्णता प्राप्त याइगु खँ धयादीगु दु। 'मन्त्रिपरिषद् विस्तार यायेगु खँय् छुं भचा विवाद खने दयाच्वंगु खःसां आः याकनं हे उकियात संवाद व सहलह यानाः ज्यंकाः फक्व याकनं सरकारयात पूर्णता बीगु जुइ' वय्कलं धयादीगु दु ।
प्रम खनालं ग्वःन्हुया दुने सरकारं पूर्णता काइ धइगु खँय धाःसा छुं स्पष्ट यानादीगु मदु। पोखरा विश्वविद्यालयया च्याक्वःगु दीक्षान्त समारोहय् झायादीम्ह प्रम खनालं पत्रकारत नापं जूगु संक्षिप्त खँल्हाबल्हाया झ्वलय् वय्कलं बैज्ञानिक ढंगं मन्त्रालय बाँडफाँड यायेगु नं धयादीगु दु ।
गृह मन्त्रालय माओवादीयात बीगु लाकि मबीगु धकाः न्यंगु छगू न्ह्यसःया लिसलय् वय्कलं आःया निंतिं बीगु व कायेगु धयागु अवस्था मदुगु तर उकिया निंतिं नं याकनं समाधानया लँपु मालेगु नं धयादीगु दु। एमाले सचिव गृहमन्त्री विष्णु पौडेलयात गृहमन्त्री दयेकेगु खँय् सहलह जूसां निष्कर्षय् धाःसा मथ्यंगु नं प्रम खनालं धयादीगु दु ।
छगू मन्त्रालयया विवादय् तक्यनाच्वनेगु स्वयां शान्ति प्रक्रिया व संविधान जारी यायेगु विषयय् सकलें गम्भिर जुइत नं वय्कलं इनाप यानादीगु दु। थुकिया निंतिं राष्ट्रिय सहमतिया आवश्यक अनिवार्य जूगु नं वय्कलं धयादीगु दु ।
