'सहमति भिंकूसा सरकार विघटन'

येँ (सन्ध्या टाइम्स)/एकीकृत माओवादीया अध्यक्ष प्रचण्डं एमालेया अध्यक्ष झलनाथ खनाललिसे जूगु न्हय्गू बुँदाया सम्झौता भिंकल धाःसा सरकार हे विघटन जुइ धयादीगु दु ।

एमालेया वरिष्ठ नेतात माधवकुमार नेपाल व केपी शर्मा ओलीं सार्वजनिक रुपं हे प्रचण्ड व खनालया दथुइ जूगु सहमति भिंकेमाः धकाः न्ववाना वयाच्वंगु इलय् माओवादीया अध्यक्ष प्रचण्डं थ्व ख्याच्वः बियादीगु खः।
वय्कलं राजनीतिक गतिरोध अन्त्य यायेगु नितिं व शान्ति नापं संविधानया नितिं ७ बुँदाया सहमति जूगु खः धयादिसें उगु सहमतियात फुक्क राजनीतिक दलपाखें सम्मान यायेमाः धयादिल। विराटनगरय थौं सुथय् संचारकर्मीतलिसे खँल्हायेगु झ्वलय् माओवादी अध्यक्ष प्रचण्डं धयादिल, 'छु कारणं सरकार गठन जुल, व हे भिंकेगु ज्या जुइवं सरकार विघटन जुइ।' वय्कलं फयांफत्तले थ्व सरकारयात हे ल्यंकाः तयेमाः धयादिसें एमालें गुलि फु उलि याकनं सहमतिया वातावरण दयेकेमाः। गुलि याकनं वातावरण दयेकी माओवादी उलि हे याकनं सरकारय् वनी धकाः नं धयादिल। एमालेया वरिष्ठ नेता केपी शर्मा ओलीं झंगः लानाः, तमसुक च्वयाः माओवादीं सहमति याकल धकाः धयाच्वंगु प्रशंगयात कयाः '७ बुँदाया सहमतियात झंगः लानाः यात, तमसुक धकाः धाःगु तसकं हे मछालपुसे च्वंगु खँ खः, अथे धायेगु धइगु देशया हे बेइज्जति खः' धकाः खँ न्ह्यथँसें माओवादी अध्यक्ष प्रचण्डं धयादिल, 'सरकार, शान्ति व संविधान दयेकेत तयार मजूपिंसं ७ बुँदाया सहमति खारेज यायेमाः धयाच्वंगु दु ।'
सहमतियात कयाः एमाले दुने अस्पष्टता जूगुलिं हे माओवादी सरकारय् मवनाच्वंगु खः धासें वय्कलं धयादिल, 'एमालेया केन्द्रीय कमिटीया बैठक जूवनाच्वंगु दु, आशा याये सहमति कथं शान्ति व संविधानयात तीब्रता बी फइ।'