देय् दबूपाखें जगतसुन्दर ब्वनेकुथियात हना
येँ (सन्ध्या टाइम्स)/नेपालभाषां शिक्षा बीगु नेपाःया हे न्हापांगु स्कूल जगतसुन्दर ब्वनेकुथियात म्हिगः छगू ज्याझ्वःया दथुइ नेवाः देय् दबू येँ जिल्ला कमिटीं हनेगु ज्या यात। म्हिगः जसतसुन्दर ब्वनेकुथी हे जूगु नेवाः देय् दबूया न्हापांगु दँमुँज्याया झ्वलय् हे उगु हनेज्या नं जूगु खः ।
ज्याझ्वलय् नेवाः देय् दबूया संरक्षक लक्ष्मण राजवंशीं जगतसुन्दर ब्वनेकुथिया प्रधानाध्यापक माया मानन्धरयात हनापौ लःल्हानादीगु खः। ज्याझ्वलय् न्ववासें भाजु राजवंशीं नेवाः देय् दबूया नां कायेबलय् उकिया नापनापं नेपालभाषा मंकाः खलःया नांयात ल्वःमंके मजिउ धयादिल ।
थनिं नीछदँ न्ह्यः खुम्ह संस्थापकपिं जानाः नीस्वंगु थुगु ब्वनेकुथिपाखें स्वक्वःगुखुसी एसएलसी परीक्षाय् ब्वति कायेगु तयारी यानाच्वंगु दु। थुकिया निंतिं थुगुसी परीक्षा क्वमचाःतले एसएलसी बीपिं विद्यार्थीतय्त होस्टेलय् हे तयाः विशेष तयारी कक्षा कायेगु ग्वसाः जुयाच्वंगु खँ स्कूल व्यवस्थापनं 'सन्ध्या टाइम्स'यात कंगु दु। थुगुसी नीनिम्ह विद्यार्थीतय्सं एसएलसी बीत्यंगु दु। थ्व स्वयां न्ह्यः निदँ तक थुगु स्कूलया विद्यार्थीतय्सं एसएलसीया बोर्डय् तकं नां पिकाःगु खः ।
नेवाः देय् दबू येँ जिल्ला कमिटीया नायः न्हुछे महर्जनया सभापतित्वय् जूगु म्हिगःया ज्याझ्वलय् दुजः मचाराजा महर्जनं वार्षिक प्रतिवेदन न्ह्यब्वयादीगु खःसा दुजः अन्जना ताम्राकारं आर्थिक प्रतिवेदन न्ह्यब्वयादीगु खः। ज्याझ्वलय् नेवाः देय् दबूया केन्द्रीय नायः नरेश ताम्रकारं नं न्ववानादीगु खः ।
