ईश्वर पोखरेलं छाय् क्याम्प हिल?
येँ (सन्ध्या टाइम्स)/एमाले अध्यक्ष झलनाथ खनाल पक्षधर जुयाः महासचिव पद त्याकूम्ह ईश्वर पोखरेलं आः वयाः छाय् चांचां हे क्याम्प हिलाः माधव-ओली क्याम्पय् च्वं वन?
म्हिगः पार्टीया केन्द्रीय ज्याकू बल्खुइ च्वंगु स्थायी समितिया बैठकय् पोखरेलं स्पष्ट रुपं हे थः खनाल क्याम्प त्वःताः माधव-ओली क्याम्पय् वनागु संकेत बिल। विज्ञ सूत्रतय्सं बिउगु जानकारी कथं वय्कलं अथे क्याम्प हिलादीगुया मू कारण वर्तमान सरकारय् उप प्रधानमन्त्री लगायत गृहमन्त्री जुइगु वय्कःया आकांक्षा खः। थः अध्यक्ष झलनाथ खनाल प्रधानमन्त्री जूगु इलय् थःत उपप्रधानमन्त्री दयेकीगु आशा पोखरेलं यानाच्वंगु खः। तर थःगु आशा पूमवनेवं वय्कः ओली क्याम्पय् वंगु खः ।
महासचिव पोखरेल ओली पक्षय् वनेवं ११ सदस्यीय स्थायी समितिया समीकरण नं गडबड जुयाः अध्यक्ष खनाल अल्पमतय् लाः वंगु दु। थ्व झिंछम्ह दुजः मध्ये झलनाथ खनालया पक्षय् स्वयं खनाल, वामदेव गौतम, युवराज ज्ञवाली, भरतमोहन अधिकारी व अशोक राई यानाः न्याम्ह दुसा माधव-ओली पक्षय् माधव नेपाल, केपी ओली, विद्या भण्डारी, विष्णु पौडेल, शंकर पोखरेल व ईश्वर पोखरेल नापं खुम्ह जूगु दु। स्थायी समितिइ मताधिकार मदुपिं पदेन दुजःत अमृत बोहरा व सिद्धिलाल सिंह धाःसा निम्हं खनाल पक्षयापिं खः ।
थ्यंमथ्यं च्याला न्ह्यः न्हूम्ह प्रधानमन्त्री ल्ययेगु नितिं प्रधानमन्त्रीया उम्मेदवारी बीगु सवालय् माधव-ओली पक्षधर जुयाः भाजु पोखरेलं हे दुई तिहाई बहुमतया ल्हाःचिं दत धाःसा जक पार्टी अध्यक्ष खनालयात उम्मेवार दयेकेगु धकाः प्रस्ताव तयादीगु खः। अबलय् दुई तिहाईया ल्हाःचिं काये मफइगु तायेकाः अज्याःगु प्रस्ताव तयाः माधव नेपालयात हे प्रधानमन्त्री याना तयेगु दाउ म्हितूगु खः धाइपिं दु। उगु इलय् खनालं ४०१ सभासद्या ल्हाः चिं कायेमाःथाय् ३९१ म्हेसिया जक ल्हाःचिं कायेफुगु खः ।
