ड्रेस पुनाः सुइ कयाच्वंपिं ज्वन

येँ (सन्ध्या टाइम्स)/थौं सुथय् कलेजया ड्रेस पुनाः पुनाः हे सिरिञ्ज पाखें लागू पदार्थ कयाच्वंगु अवस्थाय् धरानय् खुम्ह विद्यार्थीतय्त प्रहरीं ज्वंगु दु। थौं ११ बजे स्थानीय समिट उच्च माविया तेज लिम्बु, पवन राई, सोयम राई, अनुस कार्की, डेबट तामाङ व दिपेश राईयात प्रहरीं ज्वंगु खः। इपिं झिंन्यादँनिसें झिंगुदँयापिं ११ कक्षाया विज्ञान व व्यवस्थापन संकायय् ब्वनाच्वंपिं विद्यार्थीत खः। इमित धरानया शान्तिपथ लागाया खहरे धइगु थाय्या लिक्कसं सिभिल प्रहरीतय्सं ज्वनाः लिपा कलेजयात खबर याःगु खः। प्रहरीं इमित न्यनेकने यानाच्वंगु दुसा कलेजं धाःसा कन्हय् जुइगु सेमिनारया तयारी यानाच्वंगु इलय् हे इपिं अथे पिहां वंगु खँ कंगु दु ।