सरकार दयेकेत फुक्क विकल्प खुल्ला : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' सरकारयात पूर्णता बिइत माओवादीं फुक्क विकल्प खुल्ला तःगु धयादीगु दु ।
बाराया सिमरा विमानस्थलय् थौं पत्रकारतलिसे खँल्हानादिसें वय्कलं गृह मन्त्रालयया अडानं जक सरकारं पूर्णता कायेमफूगु धकाः थुइकेगु गलत जुइगु धयादिल । प्रचण्डं एमाले दुनेया समस्या समाधान मजूगुलिं मन्त्रीपरिषद् बिस्तारय् लिबाःगु जानकारी बियादिसें एमालेया हे कारण प्रधानमन्त्रीयात ज्या यायेत ज्यामछिं जूगु दावी नं यानादिल ।
प्रधानमन्त्री झलनाथ खनाललिसे नापलानाः वय्क:यात विचलित मजुसे न्ह्यःने न्ह्यायेत थःम्हं सुझाव बियाःगु जानकारी वय्कलं बियादिल । नापलाये ज्याय् प्रधानमन्त्रीं निन्हुयादुने थःगु पार्टीपाखें सृजना याःगु अवरोध अन्त्य यायेगु धयादीगु नायः प्रचण्डं प्रष्ट यानादिल । वय्कलं शान्ति व संविधानया पक्षय् दृढताया लिसे न्ह्यःने न्ह्यायेत प्रधानमन्त्री झलनाथ खनालयात सुझाव बियागु नं धयादिल ।
प्रचण्डं कंस जुइत्यंगु एमालेया केन्द्रीय कमिटी बैठकं सरकार विस्तारया अन्यौलता चीकेगु विश्वास प्वंकादिल । न्हय्गू बुँदे सहमतिबारे एमालेया संस्थागत धारणा मवःतले माओवादी सरकारय् मवनेगु वय्कलं स्पष्ट यानादिल ।
देय्या राजनीतिक गतिरोध अन्त्य यायेत माओवादीया कुतलय् एमाले नायः झलनाथ खनालयात प्रधानमन्त्रीइ निर्वाचित जूगु धयादिसें वय्कलं सरकारय् मवंसां नं समर्थन धाःसा न्ह्यानाच्वनीगु धयादिल ।
