क्रान्तिकारी शक्तित फुक्कं छप्पं जुइमा: : खनाल
प्रधानमन्त्री झलनाथ खनालं क्रान्तिकारी शक्तित फुक्कं छधी छप्पं जुयाः क्रान्तिया पक्षय् दंसा जक उपलब्धीयात संस्थागत यायेफइगु खँ धयादीगु दु ।
प्रधानमन्त्री जूगु झिंन्यान्हुलिपा थौं सनिलय् राष्ट्रया नामय् सम्बोधन यानादिसें खनालं हिउपाःया हिमायती शक्तितय्त छधी जुयाः सरकारलिसे ल्हातय् ल्हाः बियाः न्ह्यःने न्ह्यायेत इनाप यानादिल । ताःहाकःगु ई लिपा सरकार निर्माण जूसां नं सरकारं पूर्णता मदयाः जनताय् कौतुहलता जुइगु स्वभाविक जूगु धयादिसें प्रधानमन्त्री खनालं याकनं हे सरकारं पूर्णता काइगु धयादिल ।
शान्ति व संविधानया अभिभारा पूवंकेत राजनीतिक दलत दथुइ सहमतिया बाहेक मेगू विकल्प मदुगु प्रधानमन्त्री खनालया धापू खः । प्रधानमन्त्री खनालं न्हय्गू बुँदे सहमति नेपाःमि जनताया खुइदँ ताःहाकःगु त्यागपाखें उपलब्ध जूगुलि शंका मयायेत इनाप यानादिल ।
तुति सालेगु, द्वपं बियाः च्वनाः जनतां क्षमा मबीगु धयादिसें वय्कलं वय्कलं दलत एकताबद्ध जुयाः जक संविधान पिथने फइगु धयादिल । वय्कलं वर्तमान सरकारय् ब्वति कायेत कांग्रेस लगायत संविधानसभाय् प्रतिनिधित्व याइगु फुक्कं दलतय्त इनाप नं यानादिल ।
