सहमति कार्यान्वयन मजुइकं माओवादी सरकारय् मवनीगु
एकीकृत नेकपा (माओवादीं) हानं तत्काल सरकारय् मवनीगु निर्णय याःगु दु । थौं च्वंगु माओवादी स्थायी समितिया मुँज्यां तत्काल सरकारय् मवसें सरकारया पिने हे च्वनाः समर्थन यायेगु निर्णय याःगु दु ।
नेकपा (एमाले)या स्थायी समितिया मुँज्यां माओवादीयात गृह मन्त्रालय बीगु निर्णय यायेमफेवं माओवादीं तत्काल सरकारय् मवनीगु निर्णय याःगु खः । एमाले मुँज्या स्वयां न्ह्यः माओवादीया मुँज्या च्वनीगु धाःसां माओवादीं एमाले स्थायी समितिया निर्णय लिपा थःगु पार्टीया मुँज्या च्वनाः थुगु निर्णय याःगु खः ।
मुँज्या लिपा पार्टी प्रवक्ता दिनानाथ शर्मां माओवादी व एमाले दथुइ जूगु न्हय्गु बुँदे सहमतिलय् एमालेया दृढ प्रतिबद्धता व्यवहारय् प्रर्दशन मजुइकं माओवादी सरकारय् मवनीगु कनादिल ।
थ्वस्वयां न्ह्यः माओवादी नायः पुष्पकमल दाहाल 'प्रचण्ड' व प्रधानमन्त्री झलनाथ खनाल दथुइ म्हिग माओवादीयात गृह सहित झिंछगू मन्त्रालय बीगु सहमति जूगु खः ।
