संविधानसभाया म्याद थनिं १००न्हु जक
देशय् न्हूगु संविधान निर्माण यायेत जूगु संविधानसभाया निर्वाचन लिपा गठन जूगु संविधानसभाया म्याद थनिं १००न्हु जक ल्यं दनी । वंगु जेठ १४ गते तक दुगु संविधानसभाया म्यादया दुने राजनीतिक दलतय्सं संविधान निर्माण यायेमफेवं संविधानसभाया लिप्पांगु न्हि कुन्हु दच्छिया निंतिं संविधानसभाया म्याद थप याःगु खः ।
दच्छिया म्याद थप यायेधुंकाः संविधानसभाया मुँज्या जम्मा न्याक्वः जक च्वंगु दु । आः नं दलत सरकार गठन व मन्त्रालय भागबन्डाया खिचातानीलय् लगेजुयाच्वंगुलिं संविधान निर्माणया ज्या छखे लानाच्वंगु दु ।
अथे खःसां संविधानसभाया म्याद दच्छिया निंतिं थप यायेधुंकाः एकीकृत नेकपा (माओवादी)या नायः पुष्पकमल दाहाल 'प्रचण्ड'या संयोजकत्वय् निस्वंगु उच्चस्तरीय राजनीतिक कार्यदलं संविधानसभाय् दुगु निसः स्वयां अप्वः विवादीत विषय मध्ये आपालं विषयलय् सहमति याःगु खः । तर नं दलत दथुइ राज्यया पुनःसंरचना, कार्यपालिका, व्यवस्थापिका, न्यायपालिका लगायत ८३ विषयलय् अझ नं विवाद दनी ।
