हरिसिद्धिया जग्गा लित बीत स्थानीय जनताया माग
येँ (सन्ध्या टाइम्स)/२०२१ सालय् हरिसिद्धि इँटा टायल कारखाना निर्माण यायेत तत्कालिन सरकारं अधिकरण यानातःगु स्थानीय जनताया ५४८ रोपनी जग्गा आः अनया जनतां थःपिंत हे लित बीमाः धकाः माग याःगु दु ।
अबलय् उगु कारखाना पलिस्था यायेत स्थानीय जनताया ७०० रोपनी जग्गा अधिकरण यानाः काःगु खः। लिपा छुं जग्गा अप्वः जुल धकाः लित बिउगु खःसा ल्यं दुगु ५४९ रोपनी जग्गाय् कारखाना पलिस्था याःगु खः ।
थौंकन्हय् धाःसा उगु कारखाना बन्द जुयाच्वंगु दु।कारखाना बन्द जूगु कारणं स्थानीय जनतां कारखानाया निंतिं कयातःगु जग्गा थःपिंत तुं लित बीमाः धकाः माग याःगु खः। कारखाना संचालन मजुसेंलि कारखाना थुवाःतय्सं अनया जग्गा धमाधम मीगु ज्या यानाहसेंलि स्थानीय जनतां जग्गा कर्पिंत मी दइ मखु, थःपिंत तुं लित बीमाः धकाः सः तयाहःगु खः। उकिया लागिं उमिसं छगू संघर्ष समिति हे दयेकाः पलाः न्ह्याकाच्वंगु दु ।
जग्गा अधिकरण सम्बन्धी ऐनय् धयातः कथं छुं नं जग्गा अधिकरण यानाः कायेबलय् छु प्रयोजनया लागिं उगु जग्गा काःगु खः, यदि उगु प्रयोजनय् उकियात छ्यले मफुत धाःसा सम्बन्धित जग्गाथुवाःयात हे लित बीमाः। थ्वहे ऐनया लिधंसाय् स्थानीय जनतां थ्व माग यानाच्वंगु खः। संघर्ष समितिपाखें थ्वहे ऐनया लिधंसा कयाः अदालतय् छगू मुद्दा नं दायर यानातःगु दु। थौंकन्हय् पुनरावेदन अदालतय् थुकियात कयाः वहस जुयाच्वंगु दु ।
हरिसिद्धि इँटा टायल कारखानायापाखें वरिष्ठ अधिवक्ता हरिहर दाहाल, युवराज भण्डारी, शम्भु थापा लगायत न्हय्म्ह वकिलतय्सं वहस यानाच्वंगु दुसा स्थानीय जनताया संघर्ष समितिपाखें राष्ट्रिय मानव अधिकार सरोकार केन्द्रया अधिवक्ता मुक्ति प्रधान, मोहन बहादुर, विश्व प्रकाशपिंसं वकालत यानाच्वंगु दु ।
२०२१ सालय् तसकं दंक अनया जग्गा काःगु खः। अबलय् जग्गा बी मखु धकाः स्थानीय जनतां विरोध याःगु खःसां कारखाना दत धाःसा जनतायात ज्या दइ धकाः प्रलोभन बियाः जग्गा काःगु खः धाइ। आः कारखाना बन्द जुइधुंकाः अनया जग्गा मियाः लबः कायेत स्वयाच्वंगु खँ धाःगु दु ।
