प्रतापपुर दयेकेगु जिम्मा पुरातत्वयात
येँ (सन्ध्या टाइम्स)/म्हीग मलखं कयाः क्षतिग्रस्त जूगु स्वयम्भुया प्रतापपुर जीर्णोद्धार यायेगु जिम्मा पुरातत्व विभागयात बीगु निर्णय स्वयम्भु महाचैत्य संरक्षण तथा व्यवस्थापन महासमितिं याःगु दु ।
म्हीग मलः जुइधुंकाः आः प्रतापपुरया जीर्णोद्धार गय् यानाः यायेगु धकाः खँ ल्हायेत म्हिगः महासमितिया बैठक च्वंगु खः। महासमितिया नायः वरिष्ठ अधिवक्ता सर्वज्ञरत्न तुलाधरया अध्यक्षताय् च्वंगु उगु बैठकय् नेपाःस्थित युनेस्कोया प्र्रतिनिधितय्सं ब्वति काःगु खः ।
मलखं कयाः प्रतापपुरया दुने जग थ्यंक हे स्यंगु कारणं आः थुकियात हानं क्वंनिसें हे पियाः दयेके मालीगु खँ धाःगु दु। सरकारं नं थुकिया लागिं ल्याःचाः पिकायेके बीगु ज्या यानाच्वंगु दु ।
आः प्रतापपुरया उगु जीर्ण स्तम्भयात पालं त्वपुयाः तयातःगु दु। छुं जुयाः प्रतापपुर दुना वल धाःसा तःधंगु क्षति जुइफु ।
