माओवादी सहितया मन्त्रिपरिषद् विस्तारया तयारी
येँ (सन्ध्या टाइम्स)/प्रधानमन्त्री झलनाथ खनालं एकिकृत नेकपा (माओवादी)यात नं दुथ्याकाः मन्त्रिपषिद् विस्तार यायेगु तयारी यानादीगु दु। न्हय्गू बुँदाय् निगू दलया दथुइ जूगु सहमतिइ थप व्याख्या लिपा गृह मन्त्रालयया लिसें महत्वपूर्ण मन्त्रालयत माओवादीयात बीगु माओवादी अध्यक्ष प्रचण्ड व एमाले अध्यक्ष लिसें प्रधानमन्त्री खनाल दथुइ म्हिगः जूगु सहमति लिपा मन्त्रिपरिषद् विस्तार यायेगु तयारी जूगु खः ।
मन्त्रिपरिषद विस्तार यायेत आः सुथसिया ११ ताः इलय् माओवादी व एमाले स्थायी समितिया बैठक च्वनाः वर्तमान मन्त्रीमण्डलय् दुथ्याइपिं निगुलिं दलया नां ल्यइगु जूगु दु। निगू दलया आन्तरिक सहलह व लिपा मन्त्रिपरिषद् विस्तारया ज्या जुइगु माओवादीया छम्ह नेतां जानकारी बिउगु दु ।
यद्यपि थौं हे मन्त्रिपरिषद् विस्तार जुइ धाःसां जुइ वा मजुइ धइगु खँ धाःसा एमालेया भर कायेमालीगु माओवादी नेता देव गुरुङ्ग धयादीगु दु ।
थ्व हे झ्वलय् मन्त्रिपरिषद् विस्तार व न्हय्गू बुँदाय् जूगु सहमतियात कयाः एमाले दुने शुरु जूगु विवाद ज्यंकेत थौं न्हिनय्पाखे एमाले स्थायी समितिया बैठक च्वने त्यंगु दु। पार्टी स्थायी समितिया निर्णय अःखः अध्यक्ष खनालं माओवादीया सुरक्षाया दृष्टिकोणं संवेदनशील व महत्वपूर्ण गृह मन्त्रालय माओवादीयात बीगु धकाः याःगु सहमतियात कयाः वरिष्ठ नेता माधव नेपाल व स्थायी समितिय दुजः केपी ओली पक्षं विरोध याना वयाच्वंगु दु ।
आलीं स्थायी समितिया निर्णय विरुद्ध वन धाःसा पार्टी दुने व स्वयं अध्यक्ष खनालयात नं व्यक्तिगत रुपं बांमलाइगु ख्याच्वः बिउगु दु ।
