'अयोग्य' पूर्व लडाकुपाखें तालिम बहिष्कार
येँ (सन्ध्या टाइम्स)/अयोग्य धकाः शिविरं अलग्ग तःपिं माओवादीया पुलांपिं लडाकुतय्त संयुक्त राष्ट्र संघीय निकाय युएनडीपीपाखें बीगु याना वयाच्वंगु तालिमयात सुदूर पश्चिमया आपालं पूर्व लडाकुतय्सं बहिष्कार याःगु दु। युएनडीपीपाखें बिउगु तालिम खास छुं हे ज्या मवः धासें पुलांपिं लडाकुतय्सं उकियात बहिष्कार यायेगु घोषणा याःगु खः ।
पुलांपिं लडाकुतय्सं तालिमय् च्वनाः थीथी कथंया सीप सयेकाः थःपिंसं हे ज्या यानाः नयेत सक्षम जुइमा धइगु ताः तयाः युएनडीपीपाखें अज्याःगु तालिम ज्याझ्वः सञ्चालन याःगु खः ।
तर सूत्रतय्सं बिउगु जानकारी कथं पुलांपिं लडाकुतय्सं अज्याःगु तालिम काःसां नं जीविकोपार्जन यायेत धाःसा सक्षम जुयाच्वंगु मदु। युएनडीपीपाखें उमित निलानिसें स्वला तक प्लम्बिङ्ग, वाय्रिङ्ग, कृषि, कम्प्युटर आदि थेंज्याःगु ज्या स्यनेगु तालिम बीगु खः। तर तालिम कायेधुंकाः उमित गनं ज्याय् तये धकाः यंकूसा 'पुलांपिं लडाकु' धायेसातकि मनूतय्सं ज्याय् मतयेगु यानाच्वंगु कारणं तालिम काःसां नं उमिसं उकिया उपयोग याये खनाच्वंगु मदु। गुलिखे थासय् युएनडीपीया कर्मचारीत थःपिंसं हे सम्पर्क तयाः ज्याय् तयेगु कुतः यातं नं 'पूर्व लडाकु' धायेसातकि उमित ज्याय् तये मखु धयाहःगु अनुभव दुगु खँ सूत्रं धाःगु दु ।
तालिम कयां नं ज्या याये मखं धकाः छुं न्हि न्ह्यः तिनि धनगढीया छथ्वः पुलांपिं लडाकुतय्सं युएनडीपीया ज्याकुथी हे तोडफोड समेत याःगु खः। उगु घटनाय् छम्हेसित ज्वनातःगु दु। तालिम कायेत पुलांपिं लडाकुत मवःगु कारणं युएनडीपीपाखें ४० न्हुया म्याद बियाः तालिमय् सहभागी जू वा धकाः सुचं जारी याःगु दु। सुदूर पश्चिमया करिब ३०० म्ह पुलांपिं लडाकुतय्सं सुचं वःसां नं थःपिंसं उगु तालिम काः वनेगु मखु धकाः धाःगु दु ।
उखे तालिम कायेगु धकाः धनगढी थ्यंपिं गुलिखे लडाकुत नं तालिम इलय् शुरु मजूगुलिं अन हे अलपत्रय् लानाच्वंगु खँ धाःगु दु। तालिम शुरु मजूगुलिं उमित युएनडीपीं भत्ता मबिउगु द्वपं उमिसं बिउगु दु। छुं याये मफयाः निराश जूपिं न्याम्ह अयोग्य लडाकुतय्सं आत्महत्या समेत यायेधुंकूगु खँ नं उमिसं धाःगु दु ।
