मन्त्रालय बाँडफाँडय् सहमति
माओवादीयात ११, एमालेयात ८ व ल्यं दुगु मेमेगु दलयात
येँ (सन्ध्या टाइम्स)/सरकार गठनया निंतिं महत्वपूर्ण व प्रमुख भूमिका म्हितूगु एनेकपा (माओवादी)यात अन्ततः गृह लगायत झिंछगू मन्त्रालय दइगु जूगु दु। स्रोतं बिउगु छगू जानकारी कथं माओवादीयात गृहया लिसें परराष्ट्र, स्थानीय विकास, शान्ति, भौतिक योजना व निर्माण मन्त्रालय नं दइगु जूगु दु ।
माओवादी अध्यक्ष प्रचण्ड व एमाले अध्यक्ष नापं प्रधानमन्त्री खनाल दथुइ थौं सुथय् प्रधानमन्त्री निवास बालुवाटारय् जूगु सहलह लिपा माओवादीयात झिंछगू मन्त्रालय बीगु सहमति जूगु खः। अथे हे निगुलि दलया अध्यक्ष दथुइ जूगु सहमति कथं एमालेयात च्यागू मन्त्रालय बीगु सहमति जूगु दुसा नीखुगू मन्त्रालय मध्ये ल्यं दुगु न्हय्गू मन्त्रालय धाःसा मधेसी जनअधिकार फोरम नेपाल, तराई मधेस लोकतान्त्रिक पार्टी, नेपाल नापं मेमेगु चिचिधंगु दलया निंतिं फ्याःगु दु ।
