राष्ट्रपति व प्रधानमन्त्री दथुइ खँल्हाबंला

प्रधानमन्त्री झलनाथ खनालं राष्ट्रपति डा. रामवरण यादवयात नापलाना खँल्हाबंला यानादीगु दु । प्रधानमन्त्रीया शपथ ग्रहण लिपा न्हापांगु खुसी राष्ट्रपति भवन शितल निवास थ्यंकाः प्रधानमन्त्री खनालं राष्ट्रपतिनाप खँल्हाबंला यानादीगु खः ।

खँल्हाबंलाया झ्वलय् प्रधानमन्त्री खनालं थः प्रधानमन्त्री जुइ न्ह्यः माओवादी व एमाले दथुइ जूगु न्हय्गू बुँदे सहमतिया बारे जानकारी बियादीगु खः । नापं वय्कलं मन्त्रिपरिषद गठन बारे जुयाच्वंगु प्रगतिया बारे नं राष्ट्रपतियात जानकारी बियादीगु खः ।

उगु इलय् राष्ट्रपति यादवं देय् जटिल अवस्थाय् दुगु धयादिसें दलतय् सहमतिलय् याकनं मन्त्रिमण्डल गठन यानाः शान्ति व संविधानया पूर्णता बीत प्रधानमन्त्री खनालयात इनाप यानादिल ।