लण्डनय् निन्हुयंकं विश्व नेवाः सम्मेलन
येँ (सन्ध्या टाइम्स)/ विश्वया थीथी देशय् च्वंपिं नेवाःतय्सं नकतिनि गठन याःगु विश्व नेवाः संगठन (वर्ल्ड नेवाः अर्गनाइजेसन) या नीस्वना पुचःपाखें न्हापांगु अन्तर्राष्ट्रिय नेवाः सम्मेलन बेलायतया राजधानी लण्डनय् यायेगु धकाः निर्णय याःगु दु। थ्वहे वइगु ने.सं.११३१ गुंलागा १३ व १४ (अगष्ट २७ व २८, २०११) शनिबाःव आइतबाः निन्हुयंकं उगु सम्मेलन यायेगु निर्णय नं संगठनं याःगु दु ।
वर्ल्ड नेवाः अर्गनाइजेसन नीस्वना पुचःया दुजः व पासा पुचः गुथि यु.के. बोर्डया नायः कृष्ण चखुंया संयोजकत्वय् उगु सम्मेलन जुइत्यंगु खः। हलिंन्यंकं नीस्वना तःगु थीथी नेवाः खलः पुचः व नेवाः ज्याकमितय्त छथासं मुंकाः न्हू पुस्ताया नेवाःतय्त थःगु नेवाः म्हसीका गथे यानाः ल्यंका तयेगु धइगु बारे सहलह ब्याकेगु तातुनाः उगु नेवाः सम्मेलन यायेत्यंगु खः ।
थ्वहे झ्वलय् वर्ल्ड नेवाः अर्गनाइजेसनपाखें छगू वक्तव्य जारी यासें उगु भिंज्याय् सकलें मुनाः नेवाःतय् आज्जु सुथां लाके नु आह्वान याःगु दु ।
सम्मेलनय् अमेरिकाया थीथी राज्य नापं जापान, क्यानाडा, एशिया व मध्यपूर्वया थीथी देशय् च्वंपिं नेवाःतय्सं नं ब्वति काइ ।
