महराया नेतृत्वय् माओवादी सरकार वनीगु
येँ (सन्ध्या टाइम्स)/वर्तमान सरकार गठनया निंतिं प्रमुख भूमिका एकिकृत नेकपा (माओवादी) सरकारय् वनीगु जूगु दु। माओवादी पार्टी विदेश विभाग प्रमुख कृष्णबहादुर महराया नेतृत्वय् सरकारय् वनेत्यंगु खः। माओवादी सरकारय् वनेवं याकनं हे मन्त्रिपरिषद् नं विस्तार जुइगु सम्भावना ब्वलंगु दु ।
माओवादी पदाधिकारीतय् थौं सुथय् च्वंगु मुँज्यां एमाले नापं जूगु न्हय्गू बुँदाया सहमति कार्यान्वयन यासें सरकारय् वनेगु निर्णय याःगु खः। पार्टी स्रोतया कथं माओवादीयात गृह, परराष्ट्र, स्थानीय विकास लगायतया महत्वपूर्ण मन्त्रालय वइगु जुइवं सरकारय् वनत्यंगु खः।
मेखे पार्टी दुने हे नं महराया नेतृत्वय् सरकारय् वने मजिउगु धइगु खँ नं पिहां वयाच्वंगु दु। प्रधानमन्त्री निर्र्वाचनया इलय् सभासदत न्यायेगु निंतिं महरां चीनिया ब्यापारीयाके न्यय्गू करोड दां फ्वंगु अडियो टेप सार्वजनिक जुइवं विवाद लानाच्वंगुलिं वयागु नेतृत्वय् सरकारय् वने मजिउगु सः पिहां वंसां अध्यक्ष प्रचण्डं महराया हे नेतृत्वय् सरकारय् वनेगु तयारी याःगु नं सीदुगु दु ।
प्रचण्डया छेँ नयाँ बजारय् च्वंगु पदाधिकारीतय् मुँज्यां मन्त्रिपरिषद विस्तारयात न्ह्याकेगु निंतिं थ्व निर्णय याःगु जानकारी बियादीगु दु। लिसें वय्कलं एमालें न्हय्गू बुँदाया सहमति कार्यान्वयन यायेत लिबाकाच्वंगु खँय् नं दुःख तायेकादीगु दु ।
