सरकारया बारे सहलह यायेत प्रचण्ड भट्टराई निवासय्
नेकपा (एमाले)या नायः झलनाथ खनाल नेतृत्वया सरकारय् ब्वति कायेगु वा मकायेगु बारे सहलह यायेत एनेकपा (माओवादी)या नायः पुष्पकमल दाहाल 'प्रचण्ड' सोमवाः न्वकू डा. बाबुराम भट्टराईया सानेपा स्थित निवासय् थ्यंकादीगु दु ।
घौच्छि तक जूगु खँल्हाबंलाय् सरकार निर्माण नापं एमाले नाप जूगु न्हय्गू बुँदे सहमति परिमार्जनया विषयस नं निम्ह नेतात दथुइ खँल्हाबंला जूगु सीदुगु दु । एमाले दुने व पिनें माओवादीयात गृहमन्त्रालय बीमज्यूगु खँ वयाच्वंगु इलय् गृह मन्त्रालय थःगु पार्टीयात मब्यूसा छु यायेगु धइगु बारे निम्ह नेतातय्सं सहलह याःगु खः ।
माओवादीं थ्वस्वयां न्ह्यः गृह मन्त्रलाय माओवादीयात मब्यूसाः सरकार पिने हे च्वनाः वर्तमान सरकारयात ग्वाहालि यायेगु निर्णय याःगु खः । थौंया खँल्हाबंलाय् नायः प्रचण्डं गृह थःगु पार्टीयात मब्यूसां सरकारय् ब्वति कायेमाःगु बिचाः प्वंकूगु खःसा न्वकू भट्टराईं एमालें सहमति उल्लंघन याःगु धासें थःपिं अपमानित ढंग सरकारय् वनेमज्यूगु खँ तःगु खः ।
प्रधानमन्त्रीलय् एमाले नायः खनालयात समर्थन यायेगु निर्णय यायेधुंकाः माओवादी नायः प्रचण्ड व न्वकू भट्टराई दथुइ स्वापु ख्वाँउया च्वंगु इलय् निम्ह नेतात दथुइ खँल्हाबंला जूगु खः ।
