भिंतुना गुथिया वसन्त उत्सव
भिंतुना गुथिया ग्वसालय् स्वक्वःगु "भिंतुना वसन्त उत्सव ११३१" ज्याझ्वः जुल। भोताहितिया दगु बाहालय् जूगु उगु ज्याझ्वःया उलेज्या वरिष्ठ गायक व प्राज्ञ रामकृष्ण दुवालं यानादीगु खः। भाजु दुवालं बसन्तया लसय् निपु म्ये हालाः न्यंकादिसें भाषा सम्बन्धी न्ह्यागु हे ज्याझ्वः नं येँय् हे जक सीमित मजुसे गांगामय् नं याना यंकेमाःगु बिचाः प्वंकादिल ।
भिंतुना गुथि मिसा पुचःया नायः श्रृष्टी तुलाधरं भिंतुना गुथिं छगू कथं मिसापिनि उत्थानया निंतिं मिसा पुचः स्वंगु खः धयादिल ।
लोकबहादुर शाक्यं न्ह्यागु ज्या याःसां नं उकिया अर्थ थुइकेगु ज्या नं यायेमाः धासें बसन्त उत्सवया अर्थ धइगु हे शुद्ध आचरण, नैतिकवान, चरित्रवान व्यक्ति जुइगु निंतिं न्ह्याकीगु ज्याझ्वः खः धयादिल ।
उत्सवय् न्हापां अन्नपूर्ण भजन खलकं भजन श्री महामञ्जुश्री, श्री अन्नपूर्ण माताया भजन हालाः ज्याझ्वःया सुरुवात याःगु खःसा ह्दय प्रसाद मिश्र, निर्मल बज्राचार्यं ख्यालि न्यंकादीगु खः। रीता महर्जन, सुलिन्द्र शाक्य, अनूर मानन्धर, मञ्जु महर्जन, रामकृष्ण खड्गी, हरिशरण साय्मि, नेशनल शाक्य, भृगुराम श्रेष्ठ, गोबिन्द ह्यूमत, उर्मिला तुलाधर, प्रकाश ताम्राकारपिसं न्ह्यइपुक म्ये हालाः न्यंकादीगु खः ।
नातिवज्र बज्राचार्य, दुर्गालाल श्रेष्ठ, शरद कसाः, पुष्परत्न ताम्राकार स्वीटहर्ट, रोशन तुलाधर, विजयरत्न असंबरेपिंसं चिनाखँ न्यंकादीगु खःसा लाभरत्न तुलाधरं गजल न्यंकादीगु खः। अथे हे हुलाप्याखं नं न्ह्यब्वःगु खः ।
दकलय् लिपा न्ह्यब्वःगु ख्यालः बसन्त उत्सवया विशेष आकर्षण जुयाबिल। आधुनिक युगय् विदेश पलायन जुयाच्वंपिं नेवाः ल्यासे ल्याय्म्हत थःगु मां देय्या दुरावस्था स्वयाः थःगु देय् भिंकेत लिहां वयेमाः धइगु सन्देश बियाः न्ह्यब्वःगु उगु छधाः प्याखनय् नरोत्तम मानन्धर, विनिता महर्जन, सुशील राजोपाध्याय, हरिमान दिवाकर, नेरी राजोपाध्यायपिंसं म्हितादीगु खः ।
भिंतुना गुथिया नायः सचिन तुलाधरया सभापतित्वय् ज्याझ्वः न्ह्याःगु खः ।
