सहमति कार्यान्वयन याःसा पार्टीइ विद्रोह'
येँ (सन्ध्या टाइम्स)/एमालेया वरिष्ठ नेता नापं पुलांम्ह प्रधानमन्त्री माधवकुमार नेपालं एकीकृत माओवादीया अध्यक्ष प्रचण्डलिसे एमाले अध्यक्ष झलनाथ खनालं याःगु न्हय्गू बुँदाया सहमतियात यदि प्रधानमन्त्री खनालं कार्यान्वयन यात धाःसा पार्टीइ विद्रोह यायेगु जुइ धकाः ख्याच्वः बियादीगु दु ।
एमालेया अध्यक्ष खनाल व उपाध्यक्ष वामदेव गौतम पक्षधरया निगू दर्जनं मल्याक केन्द्रीय दुजःत प्रधानमन्त्रीयाथाय् वनाः वंगु शुक्रवाः जक माओवादीलिसे याःगु सहमति कार्यान्वयन यायेत बः बिउ वनेवं हथासं म्हिगः आइतवाः वरिष्ठ नेता नेपाल व केपी शर्मा ओलीं थःगु पक्षया केन्द्रीय नेतातय्त सःताः सहलह ब्याकेगु झ्वलय् वय्कलं अथे ख्याच्वः बियादीगु खः ।
एमालेया केन्द्रीय ज्याकू बल्खुइ आकाझाकां सःतूगु उगु बैठकय् नेपाल-ओली पक्षया २५ म्ह केन्द्रीय दुजः व बैकल्पिक दुजःतय्सं ब्वति काःगु खः। उगु भेलां आः याकनं हे केन्द्रीय कमिटीया बैठक सःतके बीगु धकाः नं सहलह निर्णय याःगु दु ।
बैठकय् माधवकुमार नेपाल, केपी शर्मा ओली, शंकर पोखरेल, कृष्णगोपाल श्रेष्ठ, पृथ्वी सुब्बा गुरुङ, उर्मिला अर्याल, छविलाल विश्वकर्मा, कल्पना लुइँटेल, प्रदिप नेपाल, प्रदिप ज्ञवाली, रामेश्वर फुयाँल, सुशीला नेपाल, कमला महतो लगायत मेमेपिं नं नेपाल-ओली पक्षीय नेतातय्सं ब्वति कःगु खः ।
एमाले दुने थौंकन्हय् ८६ म्ह केन्द्रीय दुजः दुसा इपिं मध्ये बच्छि माओवादीलिसे जूगु सहमति कार्यान्वयन यायेमाः धइगु पक्षय् दु। मेगु बछि सहमति कार्यान्वयन मयासे नेपाली कांग्रेसनाप जानाः वनेमाः धइगु पक्षय् दु ।
