क्षतिपूर्तिया त्तयबा दुरुपयोग मयानागु राजदूत अन्सारीया धापू
येँ (सन्ध्या टाइम्स)/साउदी अरबया निंतिं नेपाःया राजदूत हमिद अन्सारीं साउदी अरबय् वैदेशिक रोजगारय् वःपिं ज्यामित सीपिनिगु नामय् बीगु क्षतिपूर्तिया ध्यबा थम्हं दुरुपयोग मयानागु दावी यानादीगु दु। रोजगारया झ्वलय् सीपिं ज्यामितय् नामय् दूतावासय् वःगु क्षतिपूर्तिया ध्यबा थम्हं दुरुपयोग मयासे सम्बन्धित छेँजःपिंत हे छ्वयेगु यानाच्वनागु नं वय्कलं धयादीगु दु ।
साउदी अरबय् वैदेशिक रोजगारया निंतिं वंम्ह नेपाःया ज्यामियात क्षतिपूर्ति कथं वःगु ध्यबा राजदूत अन्सारीं थःगु व्यक्तिगत खाताय् तःगु द्वपं वयेवं सरकारं वंगु छुं दिं न्ह्यः जक वय्कःयात नेपाः लित सःतेगु तयारी याःगु खः ।
राजदूत अन्सारीं थःगु बिउगु द्वपं फय्गं जक जूगु धासें माल धाःसा थःगु नामय् दुगु दक्वं बैंक खाता सरकारयात क्यनेत नं थः तयार दुगु खँ धयादीगु दु। लिसें वय्कलं वैदेशिक रोजगारय् वनेगु झ्वलय् सीपिं झण्डै खुसःम्ह नेपालीया छेँजःपिंत क्षतिपूर्ति कथं न्यागू करोड पीगू लाख ध्यबा छ्वयाहयागु धासें थुलिमछि ध्यबा आतक गुगुं नं दुतावासं छ्वयामहःगु नं वय्कलं दावी यानादीगु दु ।
