सहमति निर्माण तसकं हाथ्यापूर्ण अवस्थाय् : प्रधानमन्त्री खनाल
प्रधानमन्त्री झलनाथ खनालं वर्तमान इलय् दलत दथुइ सहमति निर्माण यायेगु ज्या तसकं हाथ्यापूर्ण अवस्थाय् दुगु खँ धयादीगु दु ।
स्वन्हुन्यंकया नेपाः भ्रमणय् दीम्ह प्रजातन्त्र व विश्व मामिलासम्बन्धी अमेरिकी उपविदेशमन्त्री मारिया ओटेरोनाप सोमवाः जूगु खँल्हाबंलाय् प्रधानमन्त्री खनालं नेपाःया शान्ति प्रक्रिया स्वंगूगु चरणय् थ्यंगु धासें थुगु अवस्था तसकं हे हाथ्यापूर्ण जूसां ल्यँ दुगु ज्या क्वचायेकेत सरकार प्रतिबद्ध दुगु धयादिल ।
खँल्हाबंलाया झ्वलय् प्रधानमन्त्री खनालं शान्ति प्रक्रिया अन्तर्गत माओवादी लडाकू समायोजन व पुनःस्थापना यायेगु ज्या विशेष समिति मात्हत जुयाच्वंगु व थुगु ज्या याकनं हे क्वचाइगु धयादिल । नापं वय्कलं संविधान निर्माणय् खनेदुगु विवाद ज्यंकेत संविधानसभा अन्तर्गतया समितित सक्रिय जुयाच्वंगु नं धयादिल ।
उगु इलय् उपविदेशमन्त्री ओटेरों खनालयात प्रधानमन्त्रीलय् ल्यःगुलिं अमेरिकी सरकारया पाखें भिंतुना बियादिसें थुगु सरकारं शान्ति प्रक्रियायात पूर्णता बीगु विश्वास प्वंकादिल ।
