राजदुतत नेतात नापलय्गु ज्याय् व्यस्त
न्हूगु सरकार गठन यायेगु निंतिं राजनीतिक दलतय् बैठक तिव्र रुपं न्ह्यानाच्वंगु ईलय् थीथी देय्या राजदुततय्सं दलया नेतात नापलाय्गु ज्याय् व्यस्त जुयाच्वंगु दु ।
थौं सुथय् भारतीय राजदुत राकेश सुदं प्रधानमन्त्री पुष्पकमल दाहाल प्रचण्डयात नापलानादीगु दु । प्रधानमन्त्री प्रचण्ड व भारतीय राजदुत दथुइ न्हूगु सरकार गठन व उकी माओवादीया सहभागिता बारे खँल्हाबंला जूगु खः । अथेहे माओवादीं प्रधानसेनापति प्रकरण व राष्ट्रपितं ल्ह्वंगु पलाखय् भारतं हस्तक्षेप याःगु धकाः ब्यूगु अभिव्यक्तिया बारे नं खँ जूगु प्रधानमन्त्रीया प्रेस सल्हाकार ओम शर्मा जानकारी बियादीगु दु ।
अथेहे राष्ट्रसंघीय नियोग अनमिन प्रमुख करीन ल्यान्डग्रेनं नं प्रधानमन्त्री प्रचण्डयात नापलानादीगु दु । वयेकलं प्रधानमन्त्री प्रचण्डया नकतिनि सार्वजनिक जूगु भिडियो टेपाया बारे जानकारी कयादीगु खः । राष्ट्रसंघीय सुरक्षा परिषदया बैठकय् ब्वति कयाः बिहिवाः तिनि नेपाः लिहांझायादिम्ह ल्यानडग्रेनं नेपाःया शान्ति प्रकृयाय् राष्ट्रसंघीय अधिकारीतय्सं चिन्ता प्वंकूगु बारे प्रधानमन्त्रीया ध्यानाकर्षण याकूगु खः ।
थौं हे अमेरिकी राजदुत न्यान्सी जे पावेलं कांग्रेस सभापति गिरिजाप्रसाद कोइरालायात सुथय् नापलानादीगु दु । खँल्हाबंलाय् न्हूगु सरकार गठन प्रकृया व माओवादीया लिप्पांगु भिडियो टेप प्रकरणया बारे खँ जूगु खः ।
कोइराला निवास महाराजन्जय् जूगु खँल्हाबंलाय् राजदुत पावेलं लिपांगु राजनीतिक घटनाक्रमं ईलय् हे संविधान निर्माण मजूइगु खतरा अप्वःगु धासें कोइरालाया ध्यानाकर्षण याकूगु खः । लिसःलय् कोइरालां सहमतिया कथं हे न्हूगु सरकार गठन जुइगु व गतिरोध अन्त्य जुइगु खँ धयादीगु खः ।
