युद्ध मखु शान्ति व प्रगति : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' थःपिं युद्ध मखु शान्ति व प्रगतिया पक्षय् दुगु खँ धयादीगु दु ।
तत्कालीन नेकपा (माओवादीं) २०५२ साल फागुन १ गते शुरु याःगु जनयुद्ध लुमंकाः थौं रोल्पाया थबाङय् याःगु सभाय् नायः प्रचण्डं रोल्पां माओवादीं जनताया मुक्तया निंतिं जनयुद्ध शुरु याःगु धायादिसें आः हानं रोल्पाय् वयाः युद्ध मखु शान्ति व प्रगतिया सन्देश बी चाहे जूगु धयादिल ।
तर वय्कलं शान्ति व संविधान निर्माणय् षड्यन्त्र जुसाः जनविद्रोह यायेगु ख्याच्वः नं बियादिल । वय्कलं थःपिं इमान्दार जुयाः संविधान निर्माणया ज्याय् लगे जुयाच्वंसां राष्ट्रिय व अन्तराष्ट्रिय शक्तित न्हूगु संविधान निर्माण याके मबीगु पक्षय् दुगु धयादिल ।
झिंखुक्वःगु जनयुद्ध दिवसया लसताय् थौं हे माओवादीया नेवाः राज्य समितिं येँया भृकुटी मण्डपय् छगू तुच्चा ज्याझ्वः यात । उगु ज्याझ्वलय् माओवादीया स्वम्ह न्वकूत मोहन वैद्य 'किरण', डा. बाबुराम भट्टराई, नारायणकाजी श्रेष्ठ 'प्रकाश', मू छ्याञ्जे रामबहादुर थापा 'बादल' लगायत नेतातय् ब्वति दुगु खः ।
अथेहे माओवादीं जनयुद्ध दिवसया लसताय् थौं येँ लगायत थीथी थासय् दिपावली तकं याःगु दु ।
