रोल्पाय् जनयुद्ध दिवस
येँ (सन्ध्या टाइम्स)/एकीकृत माओवादीं थौं थीथी कथंया ज्याझ्वः यानाः १६ क्वःगु जनयुद्ध दिवस हनाच्वंगु दु। राजतन्त्रया अन्त्य यानाः सर्वहारावर्गया राज्यसत्ता पलिस्था यायेगु आज्जु ज्वनाः २०५२ साल फागुन १ गतेनिसें तत्कालीन माओवादीं सशस्त्र युद्धयात जनयुद्धया नामं शुरु याःगु खःसा वहे जनयुद्ध शुरु जूगु दिंयात लुमंकाः थौं जनयुद्ध दिवस हनाच्वंगु खः ।
जनयुद्ध दिवसया लसताय् थौं देय्न्यंकं हे थीथी कथंया रचनात्मक ज्याझ्वः यायेगु नापं बहनी दिपावली यायेगु ज्याझ्वः तयातःगु दु।तत्कालीन अवस्थाय् प्रहरी चौकीइ आक्रमण यानाः जनयुद्ध शुरु जूगु घोषणा याःगु रोल्पाया थवाङय् थौं छगू विशेष समारोह यायेगु ग्वसाः ग्वयातःगु दु। उगु ज्याझ्वलय् माओवादीया अध्यक्ष प्रचण्ड नापनापं पार्टीया बरिष्ठ नेतातय्सं ब्वति कयादी धकाः धाःगु दु। अथे हे माओवादीया नेवाः राज्य समितिं थौं जनयुद्ध दिवसया लसताय् चियापान ज्याझ्वः नाप नापं भिंतुना कालबिल ज्याझ्वः येँया भृकुटीमण्डपय् याइगु जूगु दु। अथे हे वाइसीएलं न्हूबानेश्वरय् सनिलय् छगू सभा याइगु जूगु दु ।
उगु सभाय् माओवादीया नेतातय्सं न्ववानादी धाःगु दु। अथे हे विद्यार्थी नापं थीथी जनवर्गीय संगठन व जातीय मोर्चातपाखें नं ब्यागलं ब्यागलं कथंया ज्याझ्वः याइगु जूगु दु ।
