थुगुसी बुंगद्यःया फुक्क हे सिँ हिलीगु

यल (सन्ध्या टाइम्स)/थुगुसी करुणामय रथ दयेकेगु निंतिं आः तकया हे दकलय् अप्वः सिँ मालीगु जूगु दु। यलया गुथि संस्थानं आः वइगु बुंगद्यः जात्रा चले यायेगु निंतिं विमान करुणामय बुंगद्यःया रथ दयेकेत ४०८ क्यूफिट व मीननाथया रथ दयेकेत १८६ क्यूफिट यानाः मुक्कं ६०४ क्यूफिट सिँ मालीगु खँ धाःगु दु। थुकिया लागिं आः सिँ मालेगु ज्या न्ह्यानाच्वंगु खँ गुथि संस्थान यलं धाःगु दु ।

ताः ईनिसें पूर्ण रुपं मदयेकूगु उगु रथया फुक्कं सिँ थुगुसी हिलेमालीगु जुयाः अप्वः सिँ मालीगु जुयाच्वंगु व उकिया लागिं बल्लाःगु व ज्या वःगु भिंगु सिँ मालेगु ज्या जुयाच्वंगु खँ यलया गुथि संस्थानं धाःगु दु। न्हापा छ्यलातःगु रथया सिँ फुक्कं हे तसकं जीर्ण जुइधुंकूगुलिं आः न्हूगु व ज्या वःगु सिँ लुइकाः ध्यना हयाः उचित रुपं तयेत ताः ई काइगु जुइगुलिं थ्व ज्या इलय् हे न्ह्याकेमाःगु खँ धाःगु दु। संस्थानं थुगुसी रथ दयेकेगु लागिं तःधंगु खः, थां, झिंखुकू हाकुगु सिँ, लगः थां, त्वाय्म्वः, लसिँ, धःमा, तसिँ थां व मलासिँ मालाच्वंगु खँ धाःगु दु ।

ब्वसिमा, थासिमा, बःसिमा, साल नापं थीथी सिँ मालीगु जुयाः गुथि संस्थानं बैशाख मसान्त तकया दुने रथ दयेकेमाःगु जुयाः आः स्वला न्ह्यवंनिसे सिँ मालेगु ज्या न्ह्याकूगु खः। सिँ नापं चीगु सिपः व पूया बन्दोबस्त यायेत संस्थानं बजेट फ्याना तयेधुंकूगु दु।रथया फुक्कं हे चक्काया सिँ न्हूगु तइगु जुयाः थुगुसी बांलाःगु सिँ मालेत हे लांलां बीफुगु खँ धाःगु दु। उकियात माला हयेधुंकाः नं साइनिङ व फ्रेमिङ यायेत लच्छि हे ई काइगु खँ धाःगु दु।
गुथि संस्थानया कथं रथया लागिं मदयेक मजिउगु बेक्वः सिँ थौंकन्हय् जंगलय् मदये धुंकूगुलिं निजी जग्गां न्याना हयेत थःपिं बाध्य जुयाच्वंगु दु। जितपुरया तीनपिप्लेनिसें बेक्वः सिँ व गोदावरीं फलाट सिँ हयेगु तयारी संस्थानं यानाच्वंगु दु ।